नेप्से कुहां वनेगु क्रम जारी
येँ (सन्ध्या टाइम्स)/ नेप्से कुहां वनेगु क्रमं हाकनं निरन्तरता काःगु दु। वंगु शुक्रवाः नेपाल राष्ट्र बैंकं न्हूगु मौद्रिक नीति सार्वजनिक यायेवं उतार चढाव जुयाच्वंगु नेप्से परिसूचक मंगलवाः २ अंकं कुहां वंगु खःसा म्हिगः नं ७ दशमलव ५६ अंकं कुहां वयाः ७२१ दशमलव ४९ अंक थ्यन। सेन्सेटिभ २ दशमलव ६८ अंकं व फ्लोट शून्य दशमलव ७ अंक कुहां वःगु दु ।
नेप्सेया लिसें उपसूचकतय् कारोबार नं कुहां वःगु दु। मुख्यतः नेप्से कुहां वःगुया मू कारण वाणिज्य बैंक समूह हे जुल। वाणिज्य बैंक समूह १० दशमलव ७५ अंकं कुहां वयाः ७५९ दशमलव ४६ अंकय् थ्यंगु दु ।
कारोबार कुहां वःगु मेमेगु उपसूचकय् छन्हु न्ह्यः थहां वंगु विकास बैंक समूह २ दशमलव शून्य २ अंकं कुहां वयाः ७५५ दशमलव ६४ अंक, जलविद्युत समूह २ दशमलव शून्य ९ अंकं कुहां वयाः ९७९ दशमलव ३३ अंक व विमा समूह १ दशमलव ३५ अंकं कुहां वयाः ६९१ दशमलव ७९ अंकय् थ्यंगु दु। अथे हे व्यापारिक समूह १० दशमलव ८ अंकं व अन्य समूह ५ दशमलव ८७ अंकं कुहां वल ।
नेप्से कुहां वयाच्वंसां कारोबार कम्पनी धाःसा बढे जुजुं वनाच्वंगु दु। छन्हु न्ह्यः स्वयां म्हिगः निगू कम्पनीया कारोबार बढे जुयाः ख्वीनिगू कम्पनीया कारोबार जुल। कारोबार कम्पनीया लिसें म्हिगः शेयर व दां ल्याखं नं कारोबार थहां वंगु दु ।
म्हिगः छगू लाख न्यय्निद्वः न्हय्सः व गुइ गुंगू कित्ता शेयर न्याये-मी जुयाः झिगू करोड पीस्वंगू लाख व नीच्याद्वः तका दांया कारोबार जुल। कारोबार जूगु कम्पनीत मध्ये नं स्वीच्यागू कम्पनीया भाः कुहां वःगु दु। स्वाबलम्वन विकास बैंकया शेयरय् प्रति कित्ता ४६/- तका थहां वंगु दुसा विशाल बजारया शेयरय् प्रति कित्ता १२६/- तका कुहां वःगु दु।
सिटिजन्स इन्टरनेशनल बैंकं दशलकय् अप्वः छगू करोड स्वीन्हय्गू लाखया कारोबार याःगु दु। प्रभु फाइनान्सं दकलये अप्वः कमे याःगु दुसा नारायणी फाइनान्सं अप्वः गुमे याःगु दु ।
