सहमति कथं जक सरकारं ज्या याइ : प्रधानमन्त्री
प्रधानमन्त्री माधवकुमार नेपालं सरकारं याइगु ज्या सहमति व सहकार्य कथं जक जुइगु खँ धयादीगु दु ।
अन्तर्राष्ट्रिय सम्बन्ध व मानव अधिकार समितिं ग्वसाःग्वःगु अर्न्तक्रिया ज्याझ्वलय् न्ववानादिसें प्रधानमन्त्री नेपालं राजनीतिक दलत दथुइ सहमति विना भारतं ल्वाभः मवइगु धयादिसें थम्हं नेतृत्व यानाःगु सरकार दक्वसियां सहमति व सहकार्यया सरकार जूगु दाबी यानादिल । वयेकलं सहमति व सहकार्यया आधारय् जक सरकारं निर्णय याइगु धयादिल । वयेकलं सरकारं भारतं ल्वाभः न्यायेत्यंगु धका जूगु प्रचार हल्ला जक जूगु धयादिल ।
प्रधानमन्त्री नेपालं झाडापखाला प्रभावित क्षेत्रय् सरकारं थःगु दक्वं संयन्त्र परिचालन याःगु धयादिसें दक्वं संघसंस्थायात झाडापखाला नियन्त्रणया सरकारी कुतःयात ग्वाहालि यायेत इनाप यानादिल ।
सीमा अतिक्रमण यायेत दक्वं राजनीतिक तह पाखें न्हापा सहमति यायेमाःगु धयादिसें प्रधानमन्त्री नेपालं राजनीतिक सहमति लिपा जक अर्न्तराष्ट्रिय सहमति याना समस्याया समाधान यायेमाःगु धयादिल ।
