थौं याइ सरकारं थीथी निर्णय
येँ (सन्ध्या टाइम्स)/सरकारं बढुवा याःपिं सचिवतय् पदस्थापना यायेत थौं मन्त्रिपरिषदया बैठक च्वनेत्यंगु दु।
बैठकय् सरकारं नकतिनि बढुवा याःपिं २२ म्ह सचिवतय् पदस्थापना यायेगु, जिम्मेवारी क्वःछीगु बारे सहलह जुइगु खँ दु। अथे हे सचिवतय् सरुवा बारे नं सहलह जुइ। लिसें देशय् शान्ति सुरक्षा स्थापनाया निंतिं हयेत्यंगु विशेष सुरक्षा रणनीति बारे नं सहलह ब्याकीगु खँ दु ।
थिके जुया वनाच्वंगु बेसाभाः नियन्त्रण यायेगु बारे नं थौंया बैठकय् सहलह जुइगु खँ धाःगु दु। बैठकय् पश्चिम नेपाःया थीथी जिल्लाय् न्यनाच्वंगु झाडाबान्ता पनेगु निंतिं हइगु विशेष ज्याझ्वः बारे नं निर्णय याये फइगु खँ धाःगु दु। अन न्यनाच्वंगु झाडाबान्तां आपालं मनू सीधुंकूसां सरकारं चिउताः मक्यं धासें स्वय्म एमालेया सभासद्तय्सं आलोचना याना हःगुलिं सरकारं याकनं हे विशेष प्याकेज यंकेत्यंगु खः ।
