एमाले सभासद्पाखें प्रम आलोचित
येँ (सन्ध्या टाइम्स)/ सरकारं सार्वजनिक याःगु बजेटय् एमालें थःगु घोषणा पत्रय् न्ह्यथनातःगु गुलिखे कार्यक्रमत महः धासें थौं च्वंगु एमाले संसदीय दलया बैठकय् सभासद्तय्सं सरकारया कडा आलोचना यात। बैठकय् न्ववाःपिं सभासद्तय्सं थौं करिब स्वघौ तक प्रधानमन्त्री माधव नेपाल व अर्थ मन्त्री सुरेन्द्र पाण्डेया आलोचना याःगु खः ।
यदि बजेटय् एमालेया घोषणापत्रय् न्ह्यथनातःगु कार्यक्रम समेत दुथ्याकाः संशोधन मयायेगु खःसा उकियात थःपिंसं समर्थन याये मफइगु ख्याच्वः समेत सभासद्तय्सं बिउगु खः ।
उमिसं अर्थ मन्त्रीया लाचारीया कारणं एमालेया कार्यक्रम बजेटय् दुथ्याके मफुगु द्वपं नं बिउगु खः ।
लुमंकेबहः जू, सत्ता साझेदार पार्टी नेपाली कांग्रेसं सरकारया नीति तथा कार्यक्रमय् खालि एमालेया जक कार्यक्रम दुथ्याकल धकाः आलोचना याःगु खः ।
एमाले संसदीय दलया बैठकय् न्ववाःपिं सभासद्तय्सं थःपिनि न्ह्यसः न्यनेगु लागिं प्रधानमन्त्रीं ई मबिउ धासें प्रम माधव नेपालया नं कडा आलोचना यात। सरकारं नकतिन याःगु सचिव बढुवा व निम्ह मुख्य सचिव नियुक्त यायेगु ज्यायात नं सभासद्तय्सं विरोध याःगु खः। सरकारं याःगु आपालं निर्णय थःपिंत चित्त बुझे मजू धासें सभातय्सं न्ह्यसः तयाच्वंगु दु ।
