स्वन्हु तक स्कुल बन्द
येँ (सन्ध्या टाइम्स)/सरकार व थःपिनि दथुइ जूगु सहमति कार्यान्वयन यायेमाःगु माग यासें नेपाल शैक्षिक गणतान्त्रिक मञ्चं थनिंनिसें स्वन्हु तक देय्न्यंकंया फुक्कं स्कूल बन्द याना बिउगु दु ।
शिक्षकतय् आन्दोलनया कारणं देय्न्यंकंया स्कूलय् ब्वनेगु ज्या ठप्प जुयाच्वंगु दु। मञ्चं निजी विद्यालयया शिक्षकतय् तलब सरकारी सरह जुइमाःगु, शिक्षा क्षेत्रय् ब्वलनाच्वंगु विकृति अन्त जुइमाःगु माग यासें आन्दोलन याःगु खः।
थौं हे शिक्षकतय्सं रत्नपार्कं छगू जुलुस पिकाःगु दुसा कन्हय् व कंसं शिक्षा मन्त्रालय न्ह्यःने धर्ना बीगु ज्याझ्वः दु। थ्वयां लिपा नं सरकारं थःपिनि मागयात संवोधन मयात धाःसा थप आन्दोलनया घोषणा यायेगु खँ मञ्चं धाःगु दु ।
थ्वहे झ्वलय् सरकारं शिक्षा मन्त्री रामचन्द्र कुशवाहया नेतृत्वय् वार्ता समिति दयेकूगु दुसा शिक्षक युनियनं अध्यक्ष गुणराज लोहनीया अध्यक्षताय् वार्ता समिति दयेकूगु दु।
तर शिक्षकतय्सं धाःसा शिक्षा मन्त्रीलिसे मखुसें प्रधानमन्त्री माधव नेपाल लिसे हे वार्ता यायेगु अडान कयाच्वंगु दु। थुकिं यानाः समस्या ताःहाकः जुयाच्वंगु खँ धाःगु दु ।
