बजेट प्रति एमाले सभासदत असन्तुष्ट
सत्तारुढ नेकपा (एमाले)या सभासदतय्सं न्हूगु बजेटय् थःपिनिगु ज्याझ्वः दुमथ्याकूगु धासें असन्तुष्टि प्वंकूगु दु ।
बुधवाः च्वंगु एमालेया संसदीय दलया बैठकय् न्ववापिं अधिकांस सभासदतय्सं बजेटय् कांग्रेस व माओवादी हावी जूगु टिप्पणी याःगु खः । सभासदतय्सं पार्टीया घोषणा पौलय् दुथ्याकतःगु ज्याझ्वः बजेटय् दुमथ्याकूगु धासें पार्टी नेतृत्वया नं आलोचना याःगु दु ।
सभासदतय्सं ल्ह्वंगु न्ह्यसःया लिसाः ब्यादिसें प्रधानमन्त्री माधवकुमार नेपलां गठबन्धनया सरकार जूगुलिं दल विशेषया ज्याझ्वः जक ह्येमफूगु धयादिल । वयेकलं संसदीय दल दुने खनेदुगु असन्तुष्टि शान्त यायेगु कुतः यानादिसें बाध्यता थुइकेत सभासदतय्त इनाप यानादिल ।
प्रधानमन्त्री नेपालं बजेटय् पार्टीया गुलिखें बांलाःगु ज्याझ्वःत मलाःगु प्रति थः सचेत जूगु धयादिसें कमिकमजोरी दुसाः भिंकायंकेगु बचं बियादिल ।
बैठय् एमालेया सभासदतय्सं राष्ट्रपतिया ज्याकूथी प्रमुख सचिवया व्यवस्था याःगु प्रति नं असन्तुष्टि प्वंकूगु दु । उमिसं सरकारया मुख्य सचिव सरहया हैसियतं प्रमुख सचिव देयेका राष्ट्रपतिया ज्याकूथीयात बल्लाकूगु टिप्पणी याःगु खः ।
