'जनतां चाहे जुसाः जीं पटक पटक नेपालीं सपथ कायेत तयार दु'
उपराष्ट्रपति परमानन्द झां सर्वोच्च अदालतं हानं खस भासं सपथ कायेमाःगु फैसला याना थःयात अन्याय याःगु द्वपं बियादीगु दु ।
बुधवाः थःगु हे ज्याकूथी पत्रकार सम्मेलन याना उपराष्ट्रपति झां थःयाके पदमोह मदुगु व हानं खस भासं सपथ कायेगु थःगु मनसाय मदुगु धयादिल । वयेकलं जर्बजस्ती खसं भासं सपथ कायेगु पक्ष थः मदुगु धयादिल । वयेकलं धयादिल, - 'जनतां चाहे जुसाः जीं पटक पटक नेपालीं सपथ कायेत तयार दु, तर जर्बजस्ती सपथ कायेमखु ।'
उपराष्ट्रपति झां थःयात कानुनविद् व अदालतं षड्यन्त्रपूर्वक पदं चीकेत स्वयाच्वंगु द्वपं बियादिल । वयेकलं राजनीति यायेत थःम्हं हिन्दी सपथ मकायाःगु धयादिसें दक्वं भाय् यात थःम्हं सम्मान यायेगु धयादिल । वयेलकं खस भासं च्वयातःगु सपथ पौलय् हस्ताक्षर याना थःम्हं खस भाय् प्रति सम्मान प्रकट यानागु नं स्पष्ट यानादिल ।
दक्वं समस्याया समाधान भातृत्व व सद्धभाव पाखें समाधान यायेमाःगु धयादिसें उपराष्ट्रपति झां थःयात मखुगू द्वपं ब्यूगु व षड्यन्त्र याना पदं चीकेत स्वःगु धयादिल ।
