'ल्वाभः ह्येगु बारे सम्झौता जूगु मदु'
प्रधानमन्त्री माधवकुमार नेपालं सरकार शान्ति सम्झौताप्रति प्रतिबद्ध जूगु धयादिसें भारत पाखें ल्वाभः ह्येगु छुं नं सम्झौता मजूगु स्पष्ट यानादिल ।
मंगलवाः व्यवस्थापिका संसदया बैठकयात सम्बोधन यानादिसें प्रधानमन्त्री नेपालं रक्षामन्त्री विद्यादेवी भण्डारी औपचारिक भ्रमणय् भारत वंगु जुसां समकक्षी नेतात नाप निगू देया आपसी हितया विषयस जक सहलह याःगु धयादिसें सरकार शान्ति सम्झौता प्रति कटिबद्ध जूगु धयादिल ।
प्रधानमन्त्रीं नेपाःया सुदूरपश्चिम व मध्यपश्चिमया झाडापखाला क्षेत्रय् सरकारं फक्वः कुतः यानाच्वंगु धयादिसें उखेपाखे सरकारं आवश्यक वासः, चिकित्सक लगायत सुविधात उपलब्ध यायेधुंकूगु स्पष्ट यानादिल । झाडापखाला पाखें अप्वः प्रभावित क्षेत्र जाजरकोट, रुकुम व मेमेगू झिंछगू थासय् वासः व स्वास्थ्यकर्मी लगायात अत्यावस्यक खँत छ्वयेधुंनाःगु जानकारी बियादिल ।
माओवादीं सरकारं भारत पाखें ल्वाभः ह्येत्यंगु धासें थुकीया बारे प्रधानमन्त्रीं संसदय् लिसः बीमाःगु माग यासें संसदय् गतिरोध यानाच्वनेवं प्रधानमन्त्री मंगलवाः संसदय् संवोधन यानादीगु खः । रौतहटय् हत्या याम्ह वाईसियलया केन्द्रीय दुजः लक्ष्मणराय यादवया हत्याय् सम्लगन अपराधीयात मालेगु ज्या जुयाच्वंगु व अपराधीयात कारवाही यायेगु प्रतिबद्धता प्रधानमन्त्री नेपालं प्वंकादिल । वयेकलं घटनाया छानबिना लिपाः प्रकृया पूवंका यादवयात सहिद घोषणा यायेगु धयादिल ।
अथेहे सम्बोधनय् प्रधानमन्त्री नेपालं उपराष्ट्रपतिया सपथ प्रकरणया समस्या राजनीति सहमति कथं समाधन मालेगु धयादिल । प्रधानमन्त्रीया सम्बोधन लिपाः अवरुद्ध जुयाच्वंगु संसद सुचारु जूगु दु
