उपराष्ट्रपति पाखें राजनीतिक परामर्श
उपराष्ट्रपतियात चीकेत माग यासें सर्वोच्चय् रिट दायर
सपथ विवादय् लानादिम्ह उपराष्ट्रपति परमानन्द झां उच्च राजनीति परामर्श न्ह्याकादीगु दु ।
वयेकलं मंगलवाः कांग्रेस सभापति गिरिजाप्रसाद कोइरालायात नापलानादीगु दु । हिन्दी भासं काःगु सपथ असंवैधानिक जूगु सर्वोच्चया ठहर लिपाः उत्पन्न संकट बारे सहलह यायेत वयेकलं थ्व परामर्श न्ह्याकादीगु खः ।
कोइरालानापया खँल्हाबंलाय् उपराष्ट्रपति झां थःम्हं हिन्दी भासं बाहेक मेगू भासं सपथ मकायेगु अडान कयादीगु द । उपराष्ट्रपति झां पूर्वाग्रही व असंवैधानिक जूगु धासें बरु राजीनामा बीत थः तयार जूगु धयादिल ।
अथेहे उपराष्ट्रपति झां सर्वोच्चया फैसला लिपा उत्पन्नया संकटया बारे सोमवाः मधेशवादी दलतय्त सल्लाह फ्वंसें पौ छ्वयादीगु खः । सपथ असंवैधानिक ठहर जुइवं वयेकयात राजीनामा यायेत दवाव अप्वयावंगु दु । मधेशवादी दलतय्सं उपराष्ट्रपितं हानं सपथ काये म्वाःगु अडान काःगु दुसाः मेमेगू दलतय्सं अदालतया फैसला माने यायेमाःगु खँ धयावयाच्वंगु दु ।
थ्वहे दथुइ सर्वोच्च अदालतया अवहेलना याःगु दावी यासें उपराष्ट्रपतियात पदमुक्त यायेमाःगु माग यासें मंगलवाः नवराज न्यौपाने व विष्णुप्रसाद बाँस्तोलां सर्वोच्च अदालतय् उपराष्ट्रपति विरुद्ध रिट दर्ता याःगु दु । रिटय् उपराष्ट्रपितं हिन्दी भासं काःगु सपथ अवैधानिक घोषण जुइधुंकाः नं खस भासं सपथ मकासें पदय् च्वनाच्वनेगु असंवैधानिक जूगुलिं पदपाखें वयेकयात चीकेत आदेश बीत माग याःगु दु ।
