उच्चस्तरीय राजनीतिक संयन्त्र दयेकीगु
येँ (सन्ध्या टाइम्स)/राजनीतिक सहमति कायम यायेगु विषयय् सहलह यायेत प्रधानमन्त्री माधव नेपालं थौं कांग्रेस सभापति गिरिजाप्रसाद कोइरालायात नाप लानादीगु दु।
कोइराला निवास महाराजगञ्जय् जूगु उगु सहलहय् उच्चस्तरीय राजनीतिक संयन्त्र गठन यायेगु बारे खँ जूगु खः ।
पार्टीतय् दथुइ राजनीतिक जटिलता अप्वया वनेवं उकियात गुकथं ज्यंकेगु धइगु बारे प्रम नेपाल व कोइराला दथुइ सहलह जूगु खः ।
उच्चस्तरीय राजनीतिक संयन्त्रय् च्वनेत माओवादी अध्यक्ष प्रचण्ड तयार जूगुलिं तत्काल संयन्त्र निर्माण यायेगु बारे नं वय्कःपिनि दथुइ सहलह जूगु खः। उकी च्वनेत प्रचण्डं म्हिगः सहमति क्यंगु खः ।
उगु इलय् वय्कःपिनि दथुइ उपराष्ट्रपतिं हिन्दी भासं शपथ काःगु बारे सर्वोच्च अदालतं नकतिनि बिउगु फैसला लिपा ब्वलंगु जटिल अवस्था बारे नं खँ जूगु जानकारी सूत्रं बिउगु दु।
बैठकय् भारतं ल्वाभः हयेगु सम्बन्धय् प्रधानमन्त्रीं स्पष्ट यायेमाः धकाः माओवादीं माग यानाच्वंगु खँयात कयाः नं सहलह जूगु खः ।
माओवादीया मागयात कयाः प्रधानमन्त्री नेपालं म्हिगः सदनय् संवोधन याइगु धाःसां संवोधनया भाषायात कयाः विवाद ब्वलंगुलिं म्हिगः संवोधन मजूगु खः। प्रधानमन्त्रीं थौं संवोधन याइगु ग्वसाः दु संवोधन न्ह्यः कांग्रेस, एमाले व माओवादी दथुइ बैठक च्वनाः सहमति कायम यायेगु तयारी नं जुयाच्वंगु दु ।
प्रधानमन्त्रीया संवोधनय् भारतं ल्वाभः हइगु धकाः पिहां वयाच्वंगु खँयात स्पष्ट यायेगु लिसें पश्चिम नेपालय् ब्वलनाच्वंगु झाडाबान्ताया प्रकोप, बेसाःभाः नियन्त्रण व शान्ति सुरक्षाया विषय दुथ्याइगु खँ बालुवाटार स्रोतं धाःगु दु ।
