थिमिइ थाय्थासय् डुबान
थिमि (सन्ध्या टाइम्स)/ मदिक्क वा वयाच्वंगुलिं थिमिया ब्राइटर लागाय् खुसि दुहां वयाः जलमग्न जूगु दु। उकी लानाः साखः उद्योगस्थल, राधेराधे धाम, पञ्चकन्या स्टिल डिपो, सामसुङ्ग टेलिभिजन कारखाना, श्रद्धा नर्सिङ्ग क्याम्पस नापं लिक्क छेँया छतँ डुबे जुइवं सेना, प्रहरी व स्थानीय मनूतय्सं उद्धार याःगु खः। खुसि बालं अन सुकुम्बासीतय् टहरा चुइका यंकूगु दुसा गुलिखे पक्की छेँ नं छतँ लखय् डुबे जुयाच्वंगु दु। अथे हे च्यागः झिगः ति गाडी नं डुबे जुयाच्वंगु दु। थौं सुथय् तकं गाडीत अथें लानाच्वंगु दनि। आपालं धनमाल क्षति जूसां आः तक छुं कथंया मानवीय क्षति धाःसा जूगु मदुनि। तसकं वा वःगुलिं ख्वपया ब्रम्हायणी लागाय् च्वंगु कांतां पाक्वचाय् नीगू मिटर ति लँ हे चुइका यंकूगु दु। आः अन वये-वने याये मछिनाच्वंगु दु ।
