छन्हु लिपा नेप्से २३ अंकं थहां वन
येँ (सन्ध्या टाइम्स)/ शुक्रवाः राष्ट्र बैंकं न्हूगु मौद्रिक नीति सार्वजनिक यायेवं शेयर बजाः प्रभावित जुयाः आइतवाःया कारोबारय् ३० अंकं कुहां वंगु नेप्से परिसूचक म्हिगःया कारोबारय् सुधार जुयाः २३ अंकं थहां वंगु दु ।
छन्हु न्ह्यःया कारोबारय् नेप्सेया लिसें दक्वं समूहया परिसूचक कुहां वंगु खःसा म्हिगःया कारोबारं धाःसा हाकनं थहां वंगु दु। नेप्से म्हिगः २२ दशमलव ५३ अंकं थहां वनाः ७३० दशमलव ६४ अंकय् थ्यंगु दु। सेन्सेटिभ नं ७ दशमलव ७४ अंकं थहां वंगु दुसा फ्लोट नं २ दशमलव ४८ अंकं थहां वन ।
वाणिज्य बैंक समूहया कारोबार थहां वंगुलिं नं नेप्से परिसूचक थहां वंगु खः। छन्हु न्ह्यःया कारोबारय् वाणिज्य बैंक समूहया उपसूचक ४५ अंकं कुहां वयेवं नेप्सेय् प्रभाव लाःगु खःसा म्हिगः नं थुगु हे समूहया प्रभाव नेप्से थहां वन। वाणिज्य समूहया उपसूचक ३८ दशमलव ८ अंकं थहां वनाः ७७६ दशमलव ६२ अंक थ्यंगु दु ।
अथे हे विकास बैंक समूह नं ९ दशमलव ३९ अंकं थहां वनाः ७५५ दशमलव २१ अंकय् थ्यंगु दुसा फाइनान्स समूह नं शून्य दशमलव ९९ अंकं थहां वनाः ६९५ दशमलव ७४ अंकय् थ्यन। म्हिगः नं जलविद्युत समूहपाखे उपसूचकय् धाःसा छुं हिउपाः वःगु मदु ।
आइतवाः पीप्यंगू कम्पनीया शेयर कारोबार जूगुली म्हिगः न्यय्न्यागू कम्पनीया कारोबार जुल। कारोबार जूगु कम्पनीत मध्ये झिंस्वंगू कम्पनीया भाः कुहां वःगु दुसा खुगू कम्पनीया भाः यथावत जूगु दु। छन्हु न्ह्यःया कारोबारय् अप्वः द्यापं फःगु नविल बैंकं म्हिगःया कारोबारय् उकिया पूर्ति याये कथं दकलय् अप्वः ३९०/- तका लबः कायेत ताःलाःगु दु ।
म्हिगः छगू लाख न्हय्छद्वः निसः व न्हय्खुगू कित्ता शेयर न्याये-मी जुयाः झिगू करोड गुइस्वंगू लाख झिंगुद्वः तकाया कारोबार जुल। म्हिगः कुमारी बैंकं दकलय् अप्वः शेयर कारोबार याःगु दु। कारोबार याःगु कम्पनीत मध्ये नविल बैंकं दकलय् अप्वः कमे याःगु दुसा अन्नपूर्ण विकास बैंक लिमिटेडं दकलय् अप्वः गुमे याःगु दु ।
