राजनीतिक संयन्त्र बारे कोइराला व नेपाल दथुइ खँल्हाबंला
प्रधानमन्त्री माधवकुमार नेपालं संसदया गतिरोध चीकेगु व उच्चस्तरीय राजनीतिक संयन्त्रय् माओवादी अध्यक्ष पुष्पकमल दाहाल 'प्रचण्ड'यात ब्वति कायेकेगु बारे नेपाली कांग्रेसया सभापति गिरिजाप्रसाद कोइराला नाप सहलह यानादीगु दु ।
सहलहया निंतिं मंगलवाः सुथय् कोइराला निवास महाराजगंज थ्यंकादिम्ह प्रधानमन्त्री नेपालयात नेपाली कांग्रेसया सभापति कोइरालां संयन्त्रय् च्वनेत माओवादी अध्यक्षयात थम्ह इनाप यानागु जानकारी बियादिल । अथेहे कोइरालां प्रचण्डयात संयन्त्रय् दुथ्याकेत तत्काल पहल यायेत प्रधानमन्त्रीयात इनाप यानादिल । प्रधानमन्त्री नेपालं धासाः सरकार संचालनय् सत्तारुढ पार्टी दुने पाखें हे समस्या वःगु धयादिसें राजनीतिक संयन्त्र निर्माणय् पहल यायेत कोइरालायात इनाप यानादिल ।
खँल्हाबंलाय् उपराष्ट्रपति परमानन्थ झां नं हिन्दी भासं शपथ ग्रहण यानादीगुयात सर्वोच्च अदालतं संविधान विपरीत जूगु धकाः फैसाला याःगु बारे नं सहलह जूगु खः । सहलहलय् उगु शपथ ग्रहणयात मान्यता बीत संविधान संशोधन यायेफइगु बारे नं सहलह जूगु खः ।
अथेहे खँल्हाबंलाय् सरकारयात गुकथं प्रभावकारी देयेकीगु व ल्वाभः प्रकरणया वास्तविकताया बारे नं कोइरालां प्रधानमन्त्री नाप सहलह यानादीगु खः ।
थ्वस्वयां न्ह्यः कोइराला व माओवादी अध्यक्ष दथुइ सोमवाः जूगु खँल्हाबंलाय् प्रचण्डयात संयन्त्रय् च्वनेत कोइरालां इनाप यानादीगु खः ।
