माइक्रोबस दुर्घटनाय् प्यम्ह सित

म्याग्दी सदरमुकामं दर्बा पाखे वनाच्वंगु माइक्रोबस सोमवाः न्हिनय् अर्थुङ-८ डमराय् दुर्घटना जुवलय् प्यम्ह सीगु दु । दुर्घटनाय् मेपिं झिंन्ह्यम्ह घाःपा जूगु दु ।

ना. ३. ख. ४३७९ नम्बरया उगु माइक्रोबस दुर्घटनाय् लाना सीपिं बरङजा छेँय् जुम्ह सवारी चालक खडकबहादुर थापा, अर्थुङगे-१या हिराबहादुर केसी, कुहु-७या हिरादेवी पाइजा व कैलालीया नीबहादुर पुन जूगु खँ जिल्ला प्रहरी ज्याकू म्याग्दीं धाःगु दु ।

कच्ची सतकं झन्डै १ सय ५० मिटर क्वये कुतुवनाः दुर्घटना जूगु माइक्रोबसय् घाःपा जुपिं दक्वसित वासः याकेत पोखरा यंकूगु खँ प्रहरीं धा:गु दु ।