क्षेत्रीपाखें सर्वोच्चय् रिट दायर
नेपाल राष्ट्र बैंकया निर्वतमान गभर्नर दीपेन्द्र क्षेत्रीं थःयात गैर कानुकी तरिकां पदपाखें लिकाःगु धासें सर्वोच्च अदालतय् रिट निवेदन दायर याःगु दु ।
थःयात क्वछीनातःगु ई स्वां न्ह्यः हे सरकारं स्वेच्छाचारीपूर्वक ढंगं चीकूगु धासें दायर याःगु रिट निवेदनय् प्रधानमन्त्रीया ज्याकू, प्रधानमन्त्री, अर्थ मन्त्री, अर्थ सचिव व नेपाल राष्ट्र बैंकया गभर्नर विजयनाथ भट्टराईया विपक्षी देयेकातःगु दु । क्षेत्रीं रिटय् अन्तरिम आदेश नं माग याःगु दु ।
राष्ट्र बैंकया गभर्नर विजयनाथ भट्टराईयात अख्तियारया मुद्दाया कारण निलम्बन यायेधुंका माओवादी नेतृत्वया सरकारं क्षेत्रीयात २०६५ माघ ३ गते गभर्नर नियुक्त याःगु खः । वयेकयात २०६६ माघ १७ गते तकया निंतिं उगु पदय् नियुक्त याःगु खसां सर्वोच्च अदालतं गभर्नर भट्टराईयात सफाई बीवं मन्त्रिपरिषदया आइतवाः च्वंगु बैठकं भट्टराईयात हानं गभर्नर पदय् पुनबहाली याःगु खः ।
