माओवादी लडाकूयात सेनाय् समायोजन यायेगु मुर्खतापूर्ण : ओली
एमालेया नेता केपी शर्मा ओलीं माओवादी लडाकूयात नेपाली सेनाय् छुं नं हालतं समायोजन यायेमज्यूगु खँ धयादीगु दु ।
सहिद परिवर व जनआन्दोलनय् घाःपा जूपिनि अवस्था थुइकेत सोमवाः काभ्रे थ्यंकादिम्ह ओलीं पत्रकारत नाप खँल्हाबंला यानादिसें पार्टीया लडाकुयात सेनाय् समायोजन याःसा नेपाली सेनाया अस्तित्व समाप्त जुइगु व थंज्याःगु मुर्खतापूर्ण ज्या पाखें बचे जुइत दक्वं सचेत जुइमाः धयादिल ।
वयेकलं नेपाली सेना हे राष्ट्रिय सेना जूगु न्ह्यथंनादिसें माओवादी लडाकुयात नेपाली सेनाय् समायोजन यासाः जक राष्ट्रिय सेना जुइगु माओवादीया दाबी गुनं हालतं माने यायेमफइगु धयादिल । सशस्त्र लडाकुयात सेनाय् समायोजन यासाः नेपालय् दुगु खुइनिगू सशस्त्र पुचःलं नं थःपिनिगु लडाकुतय्त राष्ट्रिय सेनाय् समायोजन यायेमाःगु एजेण्डा ल्ह्वनेफइगु धयादिल ।
रक्षामन्त्रीं भारत ल्वाभः न्यायेत वंगु धकाः माओवादीं संसदय् अवरुद्ध याःगु ज्यायात वयेकलं माओवादीं थःगु न्ह्यापं मस्वसें क्वः पाखे ब्वयें जूगु धापू नाप ज्वःलाःगु टिप्पणी यानादिल ।
