छाय् स्यन नेपाःया छ्यंगू बजाः?
येँ (सन्ध्या टाइम्स)/नेपाःया म्येय्या छ्यंगूया बजाः स्यंगु थीथी कारण दुगु खँ व्यापारीतय्सं धाःगु दु ।
व्यापारी न्हुच्छेरत्न खड्गीया कथं थनिं खुदँ न्ह्यः ब्राजिलं थःगु देय्या कृषकतय्त सा व द्वहं लहीगु ज्याय् प्रोत्साहन यायेवं अन आपालं मात्राय् छ्यंगू उत्पादन जूगुलिं नेपाःया बजाः म्हो जूगु खनेदु ।
अथे हे मेम्ह व्यापारी रमेश खड्गीया कथं चीनं थौंकन्हय् छ्यंगू थेंज्याःगु हे छगू कथं सामग्री उत्पादन याःगुलिं नं विश्व बजारय् नेपाःया छ्यंगू बजाः बामलाक स्यंगु खः ।
न्हापा चिनियाँ व्यापारीतय् कारणं हे नेपालय् छ्यंगूया भाः थहां वंगु खःसा थौंकन्हय् चिनियाँतय्सं छ्यंगू यंकेगु म्हो जुयाच्वंगु दु गुकिं यानाः भाः थहां वने मफुगु खः ।
उखे मेम्ह व्यापारी इन्द्रप्रसाद खड्गीं धाःसा नेपालय् उत्पादन जुइगु छ्यंगूया गुणस्तर बांमलाःगु कारणं हे नेपाःया छ्यंगूया माग म्हो जुया वंगु खः ।
नेपालय् लाथेपाथे म्येय् स्यायेगु यानाच्वंगुलिं छ्यंगूया गुणस्तर नं म्हो जूगु खँ कनादिसें यदि आः नं वधशालाय् आधुनिक तरिकां म्येय् स्यानाः छ्यंगू उत्पादन यायेगु खःसा उकिया बजाः बांलाइगु बिचाः नं वय्कलं प्वंकादीगु दु ।
छगू इलय् चीनय् नं नेपालं छ्यंगू यंकेगु ज्या शुरु जूगु खःसा गुणस्तर मदयेवं चिनियाँ व्यापारीतय्सं थनं छ्यंगू यंकेगु हे बन्द याःगु खँ नं वय्कलं कनादीगु दु ।
लाया व्यापार यानाच्वंपिंसं आधुनिकीकरणयात ध्यान मबीकं नेपाःया छ्यंगू बजाः बांलाइगु सम्भावना मदु धासें वय्कलं उकिया निंतिं व्यवस्थित वधशालाय् हे म्येय् स्यायेगुपाखे व्यापारीतय्सं कुतः मयासें मगाःगु बिचाः नं प्वंकादिल ।
व्यापारीतय् कथं नेपाःया छ्यंगू बजाः भज्यंक स्यनाच्वंसां सरकारं धाःसा अझ नं माक्व ध्यान बियाच्वंगु मदु।
यदि इलय् हे सरकारं स्यनाच्वंगु छ्यंगू बजाः भिंकेत ध्यान मबिल धाःसा याकनं हे नेपाःया आपालं ध्यबा डुबे जुइ फुगु खँ नं सम्बन्धित व्यापारीतय्सं धाःगु दु ।
नेपालं छ्यंगूया कारोबार जक दँय् करोडौं तकाया जुयाच्वंगु दु गुकी थीथी बैंकपाखें नं आपालं लगानी यानातःगु दु ।
