नेप्से छन्हुं हे ३० अंकं कुहां वल
येँ (सन्ध्या टाइम्स)/ सरकारं आर्थिक दँ ०६६/६७या बजेट सार्वजनिक यायेवं उच्च रुपं थहां वंगु नेप्से परिसूचक थुगु वालय् कारोबार शुरु जूगु न्हापांगु न्हिं छन्हुं हे ३० अंकं कुहां वंगु दु। बजेट सार्वजनिक लिपा थहां वनेगु क्रमं निरन्तरता काःगु नेप्से वंगु शुक्रवाः नेपाल राष्ट्र बैंक थुगु आर्थिक दँया मौद्रिक नीति सार्वजनिक यायेवं नेप्से छन्हुं हे ३० अंकं कुहां वंगु खः ।
नेप्सेया कथं छन्हुया कारोबारय् थुकथं कारोबार कुहां वनेवं छुं ईया निंतिं कारोबार स्थगित याःगु खःसा थुकथं कारोबार यायेमाःगु स्थिति न्हय्ला न्ह्यः नं जूगु खः ।
म्हिगः छन्हुं हे २९ दशमलव ७३ अंकं कुहां वनेवं समग्रय् नेप्से ७०८ दशमलव ११ अंकय् थ्यंगु दु। 'क' वर्गया कम्पनीया सूचकांक मापन याइगु सेन्सेटिभ नं ९ दशमलव ५७ अंकं कुहां वःगु दुसा फ्लोट नं २ दशमलव ८४ अंकं कुहां वल ।
वाणिज्य बैंक समूहया कारोबार म्हिगः दकलय् उच्च रुपं कुहां वयेवं उकिया प्रभाव नेप्से कारोबारय् लाःवंगु खः ।
वाणिज्य बैंक समूहया उपसूचक ४४ दशमलव ८५ अंकं कुहां वयाः ७३७ दशमलव ८२ अंक थ्यन। अथे हे विकास बैंक समूह नं १३ दशमलव शून्य ३ अंकं कुहां वयाः ७४५ दशमलव ८२ अंकय् थ्यंगु दु ।
म्हिगः जलविद्युत समूहपाखे कारोबार जूसां थुगु समूहया उपसूचकय् धाःसा छुं हिउपाः वःगु मदु ।
म्हिगः पीप्यंगू कम्पनीया शेयर कारोबार जूगुली स्वीखुगू कम्पनीया शेयरय् भाः कुहां वःगु दु उकी मध्ये दकलय् अप्वः नविल बैंक लिमिटेडया शेयरय् प्रति कित्ता ४२५/- तका कुहां वल। नेशनल हाइड्रो पावर, सिद्धार्थ डेभलपमेण्ट व त्रिवेणी विकास बैंकया शेयर भाः यथावट हे कायम जूगु दुसा कुवेर मर्चेण्ट वित्तीय संस्था, मर्चेण्ट फाइनान्स, स्टायण्डर्ड फाइनान्स, शिखर वित्तीय संस्था व यती फाइनान्सया शेयरय् भाः थहां वंगु दु ।
म्हिगः न्हय्खुद्वः चयासः व ख्वीन्हय्गू कित्ता शेयर न्याये मी जुयाः न्हय्गू करोड ख्वीस्वंगू लाख झिंखुद्वः तका दा कारोबार जुल ।
