कोइराला व प्रचण्ड दथुइ खँल्हाबंला
नेपाली कांग्रेसया सभापति गिरिजाप्रसाद कोइराला व प्रमुख प्रतिपक्षी दल एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' दथुइ खँल्हाबंला जूगु दु ।
सोमवाः कोइराला निवास महाराजगंजय् जूगु खँल्हाबंलाय् उच्चस्तरीय राजनीतिक संयन्त्र निर्माण, भारत पाखें ल्वाभ ह्येत्यंगु लगायत विषयलय् खँल्हाबंला जूगु खः ।
सिंहदरवारय् माओवादीं आव्हान याःगु सर्वदलीय बैठकया बिच्चे हे महाराजगंज थ्यंकादिम्ह प्रचण्डं कोइरला नाप समसामयिक राजनीति परिस्थितिया विषयलय खँल्हाबंला जूगु धयादिल । खँल्हाबंला लिपाः संचारकर्मीत नाप खँल्हानादिसें अध्यक्ष प्रचण्डं प्रस्तावित उच्चस्तरीय संयन्त्र निर्माणया विषय लगायत शान्ति प्रकृया, न्हूगु संविधान निर्माण, ल्वाभ प्रकरणया विषयस थःम्हं च्यूता प्वंकागू धयादिल ।
नेपाली कांग्रेसया सभापति गिरिजाप्रसाद कोइरालां उच्चस्तरीय राजनीतिक संयन्त्रय् माओवादी अध्यक्ष च्वनेत तयार जूगु खँ धयादीगु दु । शान्ति प्रकृयायात तार्किक निष्कर्षय् थ्यंकेत व ईलय् हे संविधान निर्माण यायेत थंज्याःगु संयन्त्र आवश्यक जूगु खँ खँल्हाबंलाया झ्वलय् सभापति कोइरालां धयादीगु खः ।
कांग्रेस नेता कृष्णप्रसाद सिटौलाया कथं खँल्हाबंलाय् सभापति कोइरालां ल्वाभ प्रकरण हल्ला जक जूगु धासें माओवादी थ्वहे कारण आइतवाः संसद अवरोध याःगुलिं असन्तुष्टि प्वंकादिल । अथेहे सिटौलां छुं दिं दुने हे उच्चस्तरीय राजनीतिक संयन्त्र निर्माण यायेगु खँय् कोइराला व प्रचण्ड दथुइ सहमति जूगु जानकारी बियादिल ।
