तःधंगु दलतय्त आचरण सुधार यायेत सुझाव
संविधानसभाय् प्रतिनिधित्व यानाच्वंगु चीचीधंगु दलतय्सं तःधंगु दलतय्त आचरण सुधार याना संविधान निर्माणय् गम्भीर जुइत सुझाव ब्यूगु दु ।
सिंहदरवारय् च्वंगु एकीकृत नेकपा (माओवादी)या संसदीय दलया ज्याकूथी च्वंगु सर्वदलीय बैठकय् चीचीधंगु दलतय्सं तःधंगु दलयात संविधान निर्माण, शान्ति प्रकृया लगायत विषयलय् गम्भीर मजूगु द्वपं ब्यूसें आचरण सुधार यायेत इनाप याःगु खः ।
माओवादीं सरकारं भारतं ल्वाभ ह्येत्यंगु, झाडापखाला नियन्त्रण लगायत विषयलय् खँल्हाबंला यायेत आव्हान याःगु सर्वदलीय बैठकय् सत्तारुढ नेकपा (एमाले), नेपाली कांग्रस लगायत मधेशी जनअधिकार फोरमं ब्वति मका ।
बैठकय् सरकारं भारतं ल्वाभ न्यायेत्यंगु विषयलय् न्ववापिं अधिकांश दलया नेतातय्सं थंज्याःगु ज्या पाखें शान्ति प्रकृया धरापय् लायेफुगुलि च्यूता प्वंकूगु खँ माओवादी संसदीय दलया उपनेता नारायणकानी श्रेष्ठ 'प्रकाशं' जानकारी बियादिल ।
अथेहे बैठकय् सरकारं राष्ट्रपतिया ज्याकूथी मुख्य सचिव सरहया हैसियतं सचिव त्येगु निर्णय प्रकारन्तरं सैनिक सर्वोच्चता स्थापित यायेत्यंगु धासें दलतय्सं विरोध याःगु खः । बैठकय् पश्चिम नेपालय् न्यंगु झाडापखाला, अप्वयावंगु बजाः भा, शान्ति सुरक्षा लगायतया विषयलय् नं सहलह जूगु खः ।
