भट्टराई पाखें पदबहाली
मन्त्रीपरिषदया निर्णय लिपा थःगु पुलांगु पदय् पुर्नबहाली जुयादिम्ह राष्ट्र बैंकया गभर्नर विजयनाथ भट्टराईं आइतवाः पदबहाली यानादीगु दु । अवकासप्राप्त निवर्तमान गर्भनर दिपेन्द्रबहादुर क्षेत्रीं धासाः सरकारं ब्यूगु अवकासपौलय् थःगु असहमति दुगु धासें अदालत वनेगु विषयलय् कानुनी सल्लाहकार नाप सहलह यायेगु धयादिल ।
सरकारं तत्कालीन गर्भनर क्षेत्रीयात आइतवा हे अवकास पौ बिवं राष्ट्र बैंक मुख्यालय थ्यंकाः भट्टराई नं पदभार ग्रहण यानादीगु खः । पदबहाली लिपाः संचारकर्मी नाप खँल्हाबंला यानादिसें भट्टराईं विदेश वंम्ह काय् छेँय् लिहांवःगु थंज्याःगु हे अनुभव जूगु धयादिल । वयेकलं वित्तिय संस्था अप्वःगुलिं राष्ट्र बैंकया निरीक्षण क्षमता कमजोर जूगु धासें वइगु हाथ्याया सामना याना न्ह्याः वनीगु धयादिल ।
सर्वोच्चया फैसलालिपा मन्त्रिपरिषदं भट्टराईयात वंगु शुक्रवाः पदय् पुर्नबहाली याःगु खः । निवर्तमान गर्भनर क्षेत्रीं वित्तिय क्षेत्रय् याःगु कडाइया प्रशंसा यानादिसें वयेकलं उकीयात निरन्तरता बीगु प्रतिबद्धता प्वंकादिल । वयेकया कार्यकाल माघ १७य् पूवनी ।
थ्वस्वयां न्ह्यः ज्याकू थ्यंकादिम्ह निर्वतमान गभर्नर क्षेत्रीयात सरकारं अवकास पौ बीधुंकाः संचारकर्मी नाप खँल्हाबंला यानादिसें कानुनी सल्लाहाकार नाप थुकीया विषयलय् सहलह यायेगु व वहे सल्लाहया कथं थः अदालत वनेगु वा मवनेगु निर्णय यायेगु धयादिल ।
