माओवादीं सोमवाः सर्वदलीय बैठक आव्हान

एकीकृत नेकपा (माओवादीं) सरकारं सैन्य ग्वाहालिया निंतिं भारतं ह्येत्यंगु ल्वाभ प्रकरणया बारे सहलह यायेत सोमवाः सुथय् च्याताः ईलय् सर्वदलीय बैठक सःतुगु दु ।

आइतवाः सनिलय् हाकनं च्वंगु माओवादीया केन्द्रीय सचिवालयया बैठकं थ्व सर्वदलीय बैठकया आव्हान याःगु खः । सोमवाःया सर्वदलीय बैठकय् ल्वाभ प्रकरण नापं मध्य व सुदूरपश्चिमय् न्यंगु झाडापखाला व सरकारं नकतिनि नियुक्त याःपिं सचिव व प्रमुख सचिवया विषयलय् नं सहलह याइगु खँ माओवादी प्रवक्ता दिनानाथ शर्मां धयादिल ।

अथेहे प्रवक्ता शर्मां आइतवाः सुथय् च्वंगु सचिवालयया बैठकं रौतहटय् वाईसीएलया केन्द्रीय दुजः लक्ष्मण यादवया हत्याया विषययात नं गम्भीर रुपं काःगु धयादिल ।