सुरक्षाया लागिं गृहमन्त्रीयात लुँ वहः व्यवसायीतय् ज्ञापनपत्र
येँ (सन्ध्या टाइम्स)/नेपाल सुनचाँदी व्यवसायी संघया पदाधिकारीतय्गु छगू पुचलं गृहमन्त्री भिम रावलयात नापलानाः लुँ वहः व्यवसायीतय्त शान्ति सुरक्षायालिसं सम्बन्धित विषयस वयाच्वंगु थीथी समस्यायात कयाः सहलह ब्याकेगु निंतिं ज्ञापन पौ लःल्हाःगु दु ।
संघया नाप तेजरत्न शाक्यया नेतृत्वय् वंगु उगु प्रतिनिधिमण्डलं ज्ञापनपती लुँवहः व्यवसायीतय्गु पसः, ज्यासः शोरुमय् अप्वया वनाच्वंगु चोरी, लुटपाट व हत्या थेंजाःगु घटनाया अप्वया वनाच्वंगु बारे जानकारी बिउगु खः। लिसें उगु पुचलं वंगु जेष्ठ ५ गते रुपन्देही जिल्लाया दुजः बाबुलाल विश्वकर्माया पसलय् जूगु ७० लाख बराबरया चोरी जूगु व उगु घटनायात प्रहरी प्रशासनं गम्भीरतापूर्वक मकाःगुलिं पीडितं आत्महत्या तकं याःगु घटनाको छानबीन अले विगतय् यँय् न्हिनय् गोलीं कयेकाः हत्या यानाः लुटे यायेगु थेंजाःगु घटनाया बारे ध्यानाकर्षण याःगु खः।
संघं बिउगु दक्वं समस्याया जानकारी नापं ज्ञापन पौ नं लःलहाना कासें गृहमन्त्री रावलं शान्ति सुरक्षाया निंतिं न्यागू बुँदाया अवधारणा मन्त्रिपरिषद्य् यंकेत्यनागु व उकियात सहलह लिपा याकनं हे लागू यायेगु जूगुलिं वयां लिपा शान्ति सुरक्षाया अवस्थाय् सुधार आश्वासन बियादीगु खःसा व्यवसायीतय्त जुयाच्वंगु घटनायाबारे नं प्रहरी प्रशासनयात आवश्यक निर्देशन बियाः अपराधी मालेगु ज्याय् पहल यायेगु खँ कनादिल ।
उगु प्रतिनिधिमण्डलय् संघका सल्लाहकार श्री कृष्णगोपाल श्रेष्ठया लिसें संघका पदाधिकारी, काठमाडौं शाखाया अध्यक्ष शुभकाजी शाक्य व पदाधिकारीहरु, ललितपुर शाखाया अध्यक्ष रुपकुमार शाक्य लगायतयापिं झयादीगु खः ।
