नेपाली छ्यंगूया बजाः भज्यंक स्यन
येँ (सन्ध्या टाइम्स)/अन्तर्राष्ट्रिय बजारय् म्येय्या छ्यंगूया माग म्हो जुयाः नेपाःया व्यापारीतय् करोडौं तका नोक्सान जूगु खँ सम्बन्धित व्यापारीतय्सं धाःगु दु ।
वंगु निदँ स्वदँ न्ह्यः तक छपाः छ्यंगूया भाः झिंखुसः तका थ्यनाच्वंगु खःसा आः निसः तका पुलीपिं तक नं मदयाच्वंगु खँ छ्यंगू कलेक्टर रमेश खड्गीं कनादीगु दु ।
'सन्ध्या टाइम्स' लिसे खँ ल्हासें वय्कलं नेपालय् मुंकीगु छ्यंगू लिपांगु प्रोसेसिङ्गया निंतिं भारतया कानपुरय् छ्वयेगु यानाच्वंगु खःसा आः छ्यंगू बजाः हे डाँवाडोल जुयाच्वंगुलिं छ्यंगू कलेक्टरत मारय् लानाच्वंगु खँ नं कनादिल ।
नेपाःया थीथी लागाय् कलेक्सन जुइगु म्येय्या छ्यंगू विराटनगर व वीरगञ्जय् च्वंगु थीथी कारखानां न्याना कयाः उकियात सेमि प्रोसेसिङ्ग यानाः कानपुरय् छ्वयेगु यानाच्वंगु खःसा थौंकन्हय् अन्तर्राष्ट्रिय रुपं हे छ्यंगूया बजाः डाँवाडोल जुयाच्वंगुलिं आः कानपुर नं छ्यंगू कायेत तयार मजूगु व यदि कायेत तयार हे जूसां ध्यबा बाँकी जुयाच्वंगुलिं थनया व्यापारीत मारय् लानाच्वंगु दु ।
'छ्यंगूयात खुला तक जक भण्डारण याये फइ, वयां लिपा छ्यंगू हे स्यना वनीगुलिं थुकिया व्यापारीत मारय् लानाच्वंगु दु' व्यापारी खड्गीं धयादी ।
थम्हं छपाः छ्यंगूया १२०० तका तक पुलाः न्यानातयागु खःसां थौं उकिया भाः निसः तका हे मवनेवं थःपिं थप मारय् लाःगु खँ नं वय्कलं कनादीगु दु। 'आःया भावं ला छ्यंगुली च्वंगु लः स्वयंकेत चि न्यायेत नं मथः', वय्कलं धयादी। अन्तर्राष्ट्रिय रुपं बजाः मदयेवं करोडौं तका द्यापं लाःगु जक मखु थःपिनि ध्यबा नं फँसे जुयाच्वंगु खँ नं वय्कलं कनादीगु दु ।
