जाजरकोट सीडीओयात कारवाही
येँ (सन्ध्या टाइम्स)/जाजरकोटय् झाडाबान्ताया प्रकोप जुयाच्वंगु इलय् जिल्ला त्वःताः राजधानी वयाच्वंम्ह अनया सीडीओ रेशमबहादुर पाण्डेयात कारवाही याइगु जूगु दु। म्हिगः सःतूगु सर्वदलीय बैठकय् न्ववासें प्रधानमन्त्री माधव नेपालं थ्व निर्देशन बियादीगु खः। स्वास्थ्य कर्मचारीतय्सं अन ब्रिफिंग याः कथं सरकारं थप स्वास्थ्यकर्मी छ्वये मफुगुलिं अन आः ज्या यानाच्वंपिं स्वास्थ्यकर्मी तकं ज्या याये मफुत धकाः लिहां वयेत स्वयाच्वंगु दु। माओवादी व फोरम (उपेन्द्र यादवं) बहिष्कार याःगु उगु बैठकय् नेपाः राष्ट्रिय पार्टीपाखें जाजरकोटय् दुगु गैससतय्त नं प्रकोप नियन्त्रणया ज्याय् खटे यायेगु व माने मजुल धाःसा लिपा नवीकरण मयायेगु सुझाव बिउगु खः ।
