व्यवस्थापिका संसद अवरुद्ध
रक्षामन्त्री ल्वाभ न्यायेत भारत वंगु मखु : प्रधानमन्त्री
विनियोजक विधेयकय् सहलह यायेत सोमवाः च्वंगु व्यवस्थापिका संसदया बैठक एकीकृत नेकपा (माओवादी)या अवरोध लिपा स्थगित जूगु दु ।
बैठक सुरु जुइवं सभामुख नाप ई कयाः न्ववानादिसें माओवादी संसदीय दलया उपनेत नारायणकाजी श्रेष्ठ 'प्रकाशं' सरकारं ल्वाभ न्यायेत्यंगु विषलय् प्रधानमन्त्रीं संसदय् लिसः मब्यूतल्ले संसद बहिष्कार यायेगु धयादिल ।
वयेकलं सरकारं शान्ति प्रकृया स्यंकेत स्वःगु द्वपं बियादिसें शान्ति प्रकृया जारी जूगु ईलय् सेना समायोजनयात ध्यान बीमाःथाय् ल्वाभ न्यायेत सरकारयात हथाये जूगु धयादिल । वयेकलं सरकारया थ्व पलाखं गृहयुद्ध ब्वलंकेत स्वःगु धयादिल । वयेकलं न्ववायेवं माओवादीया सभासदतय्सं नाराबाजी याना व्यवस्थापिका संसदया बैठक बहिष्कार याःगु खः ।
अथेहे व्यवस्थापिका संसदय् न्ववानादिसें नेता प्रकाशं महंगी नियन्त्रण व झाडापखाला नियन्त्रण यायेत सरकार गम्भीर मजूगु द्वपं बियादिसें स्वास्थ्य मन्त्रीया राजीनामा माग यानादिल । नापं वयेकलं आइतवाः रौतहटय् माओवादी कार्यकर्ता लक्ष्मण यादवयात प्रहरीया ग्वाहालि तराईया सशस्त्र पुचलं स्याःगु द्वपं बियादिल ।
थ्वहे दथुइ सोमवाः राज्य व्यवस्था समितिया बैठकय् न्ववासें प्रधानमन्त्री माधवकुमार नेपालं रक्षामन्त्री विद्या भण्डारी ल्वाभ न्यायेत भारत मवंगु खँ धयादिल । वयेकलं सरकारं ल्वाभ न्यायेमासाः सरकारं दक्व पक्ष नाप सहलह यानाः जकः न्यायेगु धयादिल ।
