यातायात व्यवसायीतय्सं आन्दोलन लितकाल
छुं न्हि न्ह्यः निसें स्वनिगःलय् सार्वजनिक यातायात चलेमयासें विरोध यानाच्वंपिं व्यवसायीतय्सं थःपिनिगु आन्दोलन लितः काःगु दु ।
आइतवाः सरकार व यातायात व्यवसायी महासंघ नाप जूगु वार्ताय् थीथी ईलय् सार्वजनिक सवारी साधानय् जूगु तोडफोडया क्षतिपूर्ति व तोडफोडयापिंत कानुन बमोजिम कारवाही यायेगु सहमति जुइवं व्यवसायीतय्सं आन्दोलनया दक्वं ज्याझ्वः लित काःगु खः ।
जिल्ला प्रशासन येँय् जूगु वार्ताय् सरकारं क्षतिपूर्ति स्वरुप प्यंगू लाख बीगु सहमति जूगु दु । नापं तोडफोडया झ्वलय् घाःपा जुपिं यातायात व्यवसायीतय्त सरकारं निशुल्क वासः यायेगु व्यवस्था नं यायेगु सहमति जूगु दु ।
थीथी पुचःलं या:गु आन्दोलनया झ्वलय् वंगु मंगलवाः त्रिचन्द्र कलेज व बालजुइ निगः माइक्रोबसय् तोडफोड याःगु खः । यातायता व्यवसायीतय्सं तोडफोड याःगु सवारीसाधानया थुवायात क्षतिपूर्ति बीमाःगु व तोडफोड याःपिंत कारवाही यायेमाःगु माग याना स्वनिगःलय् अनिश्चितकालीन सार्वजनिक सवारीसाधन चलेमायायेगु कथं आन्दोलन यानाच्वंगु खः ।
