हत्याया विरोधय् रौतहट बन्द
एकीकृत नेकपा (माओवादी)या भातृ संगठन वाइसियलया केन्द्रीय दुजः लक्ष्मण यादवया हत्याया विरोधय् माओवादीं आइतवाः नं निसें अनिश्चितकालीन रौतहट बन्दया आव्हान याःगु दु ।
सीम्ह यादवयात शहिद घोषणा यायेमाःगु, यादवया छेँजःयात क्षतिपूर्ति बीमाःगु, हत्यारायात कारवाही यायेमाःगु माग यासें माओवादी कार्यकर्तातय्सं शनिवाः सनिल निसें हे पूर्व-पश्चिम महेन्द्र राजमार्ग नं अवरोध याःगु दु ।
माओवादी कार्यकर्तातय्सं आइतवाः सुथं निसें वीरगन्ज क्षेत्र व गण्डक चोकय् टायर च्याकाः सतक अवरुद्ध याःगु दु । अवरोधया कारण नं अन यातायत तकं अवरुद्ध जूगु दु । अथेहे बाराया कलैयाय् नं माओवादी कार्यकर्तातय्सं विरोध प्रदर्शन यानाच्वंगु दु ।
उखे माओवदीया मिथील राज्य समितिं नं थःगु राज्य अन्र्तगत लाःगु छुं छुं पूर्वया जिल्ला बन्दया आव्हान याःगु दु । बन्दया कारणं राजमार्गय् यात्रा याइपिं सर्वसाधारणत अलपत्र जूगु दु ।
भोजपुरा राज्य समितिया दुजः नं जुम्ह यादवयात शनिवाः न्हिनय् तराईया छगू सशस्त्र पुचः तराई मुक्ति मोर्चां गोलीं क्येकाः स्याःगु खः ।
