उपराष्ट्रपति सम्बन्धि सर्वोच्चया फैसालय् मधेशी नेतातय् विरोध
उपराष्ट्रपति परमानन्द झां थःगु पदय् बहाल जुइत हिन्दी भासं कयादीगु सपथ संविधान विपरित जूगु धकाः सर्वोच्च अदालतं ब्यूगु निर्णयया मधेशी नेतातय्सं विरोध याःगु दु ।
मधेशी जनअधिकार फोरमया अध्यक्ष उपेन्द्र यादवं शनिवाः सुनसरीइ पत्रकारत नाप खँल्हानादिसें उपराष्ट्रपितं नेपाली भासं हे हानं सपथ कायेमाः धकाः सर्वोच्चं याःगु फैसला असंवैधानिक व लोकतान्त्रिक पद्धति विरोधी जूगु टिप्पणी यानादिल । सर्वोच्चया आदेश एकपक्षीय जूगु धासें यादवं थुगु फैसलां नेपाः दक्वः जाति व भाषीया केब जूगु धापूयात अस्वीकार याःगु द्वपं बियादिल ।
अथेहे शनिवाः येँय् जूगु छगू ज्याझ्वः लिपा संचारकर्मीतय्त प्रतिक्रिया बियादिसें तराई-मधेश लोकतान्त्रिक पार्टीया अध्यक्ष महन्त ठाकूरं उपराष्ट्रपति झाया हिन्दी भासं काःगु सपथयात सर्वोच्च अदालतं याःगु फैसालायात प्रतिगामी जूगु धयादिल । वयेकलं न्हपा निसें हे थंज्याःगु निर्णय जुयावयाच्वंगु धासें थुकीया विरुध आन्दोलन यायेगु ख्याच्वः बियादिल ।
उपराष्ट्रपति झां नं २०६४ साउन ८ गते हिन्दी भासं सपथ कयादीगु अवैधानिक जूगु ठहर यासें वयेकलं हानं नेपाली भासं सपथ कायेमाःगु निर्णय सर्वोच्च अदालतं वंगु शुक्रवाः याःगु खः ।
