प्रधानमन्त्रीं दातृ निकाययात ग्वाहालि यायेत इनाप
प्रधानमन्त्री माधवकुमार नेपालं झाडापखाला न्यंगु मध्यपश्मि क्षेत्रय् स्वास्थ्य मन्त्रालयं प्रभावकारी भूमिका निर्वाह मयाःगु खँ स्वीकार यानादीगु दु । वयेकलं स्वास्थ्य मन्त्रालं अपेक्षाकृत सन्तोषजनक भूमिका म्हिते मफुगु धासें तत्काल झाडापखाला नियन्त्रणया निंतिं पहल यायेगु धयादिल ।
शनिवाः प्रधानमन्त्री ज्याकू सिंहदरवारय् दातृ संस्थाया प्रतिनिधितनाप खँल्हाबंला यानादिसें प्रधानमन्त्री नेपालं थ्व खँ स्वीकार यानादीगु खः । वयेकलं दातृ संस्थाया प्रतिनिधितनाप झाडापखाला महामारी न्यंगु मध्यपश्चिम क्षेत्रय् तत्काल ग्वाहालिया निंतिं इनाप यानादीगु खः ।
निनीगु दातृ निकायतय् प्रतिनिधितय्सं ब्वति काःगु खँल्हाबंलाय् वयेकलं मध्यपश्चिमया झाडापखाला प्रभावित क्षेत्रयात संकटग्रस्त क्षेत्र घोषणा याना जुसां झाडापखाला नियन्त्रण यायेगु जानकारी बियादिल ।
