'प्रचण्डं राष्ट्रिय सरकारया नेतृत्व याइमखु'

एकीकृत नेकपा (माओवादी)या वरिष्ठ नेता मोहन बैद्यं पार्टीया अध्यक्ष पुष्पकमल दाहाल 'प्रचण्डं' न्हूगु गठन जुइगु राष्ट्रिय सरकारया नेतृत्व यानामदीगु खँ धयादीगु दु ।

शनिवाः कलम वाः पौ नं येँय् ग्वसाःग्वःगु छगू ज्यझ्व: लिपाः संचारकर्मीत नाप खँल्हाबंला यानादिसें वयेकलं अध्यक्ष दाहालं थःम्ह सरकारया नेतृत्व मयायेगु खँ धायेधुंकूगु धासें वयेकया पलेसा सुनां नेतृत्व याइगु खँय् पार्टी दुने सहलह जुयाच्वंगु धयादिल ।

संविधान सभा माओवादीं ल्वंहगु नारा जूगु धयादिसें वयेकलं थःगु दलं नेतृत्व याःगु सरकारं जक संविधान च्वयेफइगु ठोकुवा यानादिल । अथेहे वैद्यं थःपिंसं नेतृत्व याःगु सरकार विदेशीया दलाल मजुइगु धयादिसें वर्तमान सरकारयात 'कतामरी'या संज्ञा बियादिल ।