भट्टराईयात गभर्नरय् पुनर्वहाली
मन्त्रीपरिषदया बैठकं विजयनाथ भट्टराईयात नेपाल राष्ट्र बैकंया गर्भनरय् पुर्नबहली याःगु दु ।
प्रधानमन्त्रीया ज्याकू सिंहदरवारय् शुक्रवाः च्वंगु मन्त्रीपरिषदया बैठकं असार ३१ गते सर्वोच्च अदालतं भ्रष्टाचारया मुद्दाय् दोषी मजूगु फैसला याम्ह भट्टराईयात पुर्नबहाली याःगु खः । अथेहे बैठकं माधवप्रसाद घिमिरेयात मुख्य सचिवया जिम्मेवारी ब्यूगु दु । बैठकं मुख्य सचिव सरह जिम्मेवारी जुइ कथं राष्ट्रपतिया ज्याकूया सचिवय् उमेशप्रशाद मैनालीयात जिम्मेवारी ब्यूगु दु ।
मन्त्रीपरिषदया बैठकं नीनिम्ह सचिवया नां नं अनुमोदन याःगु दु । शुक्रवाः हे च्वंगु प्रशासनिक समितिं खुइखुम्ह मध्ये निर्णय यापिं नीनिम्हेसिया नां मन्त्रीपरिषदया बैठकं अनुमोदन याःगु खः । मन्त्रीपरिषदया बैठकं दिनेशहरि अधिकारी, युवराज भुषाल, दीप बस्नेत, केशवप्रसाद भट्टराई, प्रताप पाठक, मदनकुमार भट्टराई, निरञ्जन बराल, सुशिल घिमिरे, नवीन घिमिरे, कृष्ण ज्ञावली, रुद्रकुमार श्र्रेष्ठ, मोदनाथ डोटेल, कृष्णहरि बास्कोटा, विनोदकुमार ज्ञवाली, धुव्रप्रसाद शर्मा, यज्ञप्रसाद गौतम, नाथुप्रसाद चौधरी, रामस्वरुप सिन्हा, गणेशराज जोशी, नगेन्द्र प्रसाद घिमिरे, किशोर थापायात सचिवय् बढुवा या:गु ख: । बैठकं स्वास्थ्य मन्त्रालयलया सचिवय् डा. सुधा शर्मा व डा. प्रवीण मिश्रयात बढुवा या:गु दु । अथेहे सरकारं कायम मुकायम सचिवय् डा. धनराज रताला, अर्जुन भण्डारी व जनार्दन नेपालयात नियुक्त या:गु दु ।
अथेहे शुक्रवाः मन्त्रीपरिषदया बैठकं निर्वतमान मुख्य सचिव भोजराज घिमिरेयात क्यानाडाया राजदुतया जिम्मेवारी ब्यूगु दु । अथेहे श्रीलकंया राजदुतय् सुशिलचन्द्र अमात्ययात नियुक्त याःगु दु ।
बैठकं राष्ट्रिय योजना आयेगया उपाध्यक्ष डा. युवराज यतिवडाया संयोजकत्वय् महंगी नियन्त्रण समिति नं गठन याःगु दु ।
