लडाकू समायोजनबारे याकनं निर्णय यायेत सरकार नाप इनाप
राष्ट्र संघीय नियोग अनमिनं सुरक्षा निकायलय् समायोजन याइगु माओवादी लडाकूतय् ल्याः बारे याकनं निर्णय यायेत सरकार नाप इनाप याःगु दु ।
योग्य ठहर जुपिं झिंगुद्वं लडाकुत मध्ये गुलियात सुरक्षा अंगय् समायोजन यायेगु धइगु विषयलय् प्रमुख दलत दथुइ विवाद सार्वजनिक जूगु ईलय् अनमिनया थ्व धापू पिहांवःगु दु । अनमिनं समायोजन प्रारुपबारे याकनं निर्णय यायेमाःगु खँ धाःगु दु ।
अनमिनया कार्यअवधि खुलाया निंतिं थप यायेगु सुरक्षा परिषदया सर्वसम्मत निर्णय लिपा न्यूयोर्कय् च्वंगु राष्ट्रसंघीय मुख्यालय् ग्वसाःग्वःगु पत्रकार सम्मेलनय् अनमिनया प्रमुख क्यारिन लेनग्रेनं उगु खँ धयादीगु खः । दिगो शान्ति स्थापनाया निंतिं माओवादी लडाकुतय् भविष्य निर्धारण यायेत जरुरी जूगु धासें वयेकलं आ: निष्कृय विशेष समितियात याकनं पुर्नगठन यायेत नं आव्हान यानादिल ।
वयेलकं शान्ति प्रकृया ठप्प जूगु धासें उकीया निंतिं सरोकारवाला दक्वं पक्ष जिम्मेवार जुइमाःगु धयादिल । वयेकल राष्ट्रिय सरकार व उच्चस्तरीय राजनीतिक संयन्त्र गठन यायेत दलतय् प्रस्तावया प्रशंसा नं यानादिल ।
