संवैधानिक परिषदया बैठक स्थगित
शुक्रवाः च्वनीगु धाःगु संवैधानिक परिषदया बैठक औपचारिक विषयलय् दुहांहे मवंकं स्थगित जूगु दु ।
प्रमुख प्रतिपक्षी दल एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड'बैठकय् उपस्थित जुइमफुगु धकाः माओवादी नेता देवा गुरुङं जानकारी बीवं बैठक औपचारिक विषलय् दुहांहे मवंक स्थगित जूगु खः । समितिया मेगू बैठक सोमवाः च्वनीगु जूगु दु ।
परिषदय् प्रधानमन्त्री, प्रमुख प्रतिपक्षी दलया नेता, संविधानसभाया अध्यक्ष नापं उपप्रधानमन्त्री विजय गच्छेदार, परराष्ट्रमन्त्री सुजाता कोइराला व रक्षामन्त्री विद्या भण्डारी दी ।
खाली जुयाच्वंगु संवैधानिक निकायया प्रमुखत नियुक्त यायेत समितिया बैठक च्वंगु खः । संवैधानिक निकायत लोकसेवा आयोग, अख्तियार दुरुपयोग अनुसन्धान आयोग, निर्वाचन आयोग व महालेखा परीक्षकया प्रमुखतय् पद खाली जुयाच्वंगु दु ।
प्रमुख स्वंगु दलत नेकपा (एमाले), नेपाली कांग्रेस व माओवादी दथुइ भागबण्डाय् सहमति जुइमफुगुलिं संवैधानिक आयोगय् नियुक्ति जुइमफुगु खः । निर्वाचन आयोग एमालेयात, अख्तियारय् कांग्रेसयात व लोकसेवाय् माओवादीयात बीगु सहमति जुइफइगु खँ सीदुगु दु ।
