उपराष्ट्रपति झां नं हिन्दी भासं काःगु सपथ असंवैधानिक
उपराष्ट्रपति परमानन्द झां नं पदय् बहाल जुइत हिन्दी भाषं काःगु सपथ असंवैधानिक जूगु ठहर सर्वोच्च अदालतं याःगु दु ।
शुक्रवाः सर्वोच्च अदालतं उपराष्ट्रपति झां नं हिन्दी भासं काःगु सपथयात संविधान विपरित जूगु निर्णय याःगु खः । थ्व निर्णय लिपाः झां नं पदय् बहाल जुइत हाकनं नेपाली भाषं सपथ कायेमालिगु जूगु दु ।
सर्वोच्च अदालतया प्रधान्यायाधीस मीनबहादुर रायमाझी व न्यायाधीस बलराम केसीया मंकाः इजलासं नेपाःया अन्तरिम संविधानय् राष्ट्र भाय् नेपाली धकाः न्ह्यथंनातःगु व सपथया ढाँचा नं नेपाली भाय्लय् हे दुगुलिं वयेकलं हिन्दीइ काःगु सपथ संविधान विपरित जूगु ठहर याःगु खः ।
अथेहे सर्वोच्चं देवनागरी लिपि ज्याखँया भाय् नेपाली हे जूगु धासें उपराष्ट्रपति झां नं पदय् बहाल जुइत हाकनं नेपाली भासं सपथ कायेमाःगु निर्णय याःगु दु ।
२०६५ साल साउन ८ गते उपराष्ट्रपति झां हिन्दी भासं काःगु सपथ संविधान विपरित जूगु धासें अधिवक्ता बालकृष्ण न्यौपानें सर्वोच्च अदालतय् रिट दायर या:गु ख: ।
