छाय् नेपालय् मवल भारतीय म्येय् ?
येँ(सन्ध्या टाइम्स)/नेपालय् म्येय्या ला अभाव जुयाच्वंगु इलय् भारतं धाःसा थीथी देशय् म्येय्या ला निर्यात यानाः प्रशस्त आम्दानी यानाच्वंगु दु ।
सन् २००१ य् भारतया अलिगढ व गाँजियावादय् वधशाला दयेकेधुंकाः आः तक अन १४ गू ततःधंगु वधशाला निर्माण जुइधुंकूगु दु ।
जानकार सूत्रया कथं भारतय् छगू वधशालां न्हिं झिंन्यासः निसें निद्वःम्ह तक म्येय् स्यानाच्वंगु दुसा उकिया ला फुक्कं अरब लिसें यूरोप व अष्ट्रेलियाय् निर्यात जुयाच्वंगु दु ।
भारतं थथे पिने ला निर्यात शुरु याःगु कारणं हे नेपालय् भारतीय म्येय् वयेगु म्हो जूवंगु खँ थनया व्यापारीतय्सं धाःगु दु। म्येय् मदयाः नेपालय् म्येय्या लाया भाः नं थहां वनाच्वंगु दु ।
भारतया वधशालातय्सं ला उत्पादन यायेगु लिसें उकिं वइगु मेमेगु पदार्थपाखें साः दयेकेगु ज्या नं यानाच्वंगु दु ।
भारतया वधशालातय्सं म्येय्या क्वँय् व न्यकूयात वधशालाय् तुं दुगु मेगु कारखानाय् छ्वयाः थीथी कथंया क्लिप, टाँख आदि दयेकेगु ज्या नं नापनापं हे यानाच्वंगु दइ।
यदि वधशालायात थुकथं व्यवस्थित रुपं न्ह्याकेगु खःसा भारतय् थें तुं नेपालय् नं आपालं लबः काये फइगु खँ व्यापारीतय्सं धाःगु दु। तर अथे खःसां नेपाःया व्यापारीतय्सं लाया व्यापारयात थुकथं व्यवस्थित रुपं न्ह्याके धाःसा फयाच्वंगु मदुनि। नेपालय् सरकारीस्तरं हेटौंडाय् वधशाला दयेकेधुंकाः अष्ट्रेलियाय् लाया निर्यात समेत शुरु यायेधुंकूगु खःसां उकियात निरन्तरता धाःसा बी मफुत ।
हेटौंडा लिपा येँया थक्वाः व ककनीइ नं वधशाला दयेकूगु खः। तर ला व्यापारीतय् असहयोगया कारणं वधशाला चले याये मफुगु खँ सम्बन्धित व्यापारीतय्सं धाःगु दु ।
