नेवाः मिसा गुथिया सम्मेलन क्वचाल
येँ (सन्ध्या टाइम्स)/नेवाः मिसा गुथि, नेपालमण्डल यल लागाया निक्वःगु वार्षिक साधारण सभा नेवाः देय् गुथि नेपाल मण्डलया नायः नरेन्द्रभक्त हाडाया मूपाहाँसुइ क्वचाल।
ज्याझ्वलय् न्ववायेगु झ्वलय् वय्कलं नेवाः स्वायत्त राज्य प्राप्तिया लागि न्ह्याका वयाच्वनागु नेवाः आन्दोलनय् मिसा गुथिं बिया वयाच्वंगु योगदानया कदर यासें संविधान च्वये सिमधःतले सकल नेवाः मिसातसें न्हापा स्वयां अप्वः प्रतिवद्ध जुयाः थुगु आन्दोलनयात तिबः बी मानिगु खँ कनादिल ।
गुथिया न्वकु मोहनबहादुर महर्जन, नेपालभाषा मंकाः खलः यलया न्वकु किरण शाक्यं थौंया संघीय लोकतान्त्रिक गणतन्त्र नेपालय् झी नेवाःतय्सं थःगु आदिभूमिइ झीसं हे शासन याये दयेमाःगु खँ ध्वाथुइकादिल ।
वय्कःपिंसं नेवाः स्वायत्त राज्यया व्यवस्थापिका, कार्यपालिका व न्यायपालिकाया फुक्कं तहलय् नेवाः मिसा मिजंतसें प्रमुख पदय् च्वनाः ज्या याये दयेकेमाः धयादिल।
नेवाः मिसा गुथिया केन्द्रीय न्वकु मिलन शाक्यं नेवाः मिसा गुथिया उपादेयता व आः तकया ज्याया बारे कनादिल ।
नेवाः देय् गुथि नेपालमण्डलया केन्द्रीय सल्लाहकार शाक्य सुरेन, मिसा गुथि यलया सल्लाहकार चतुर ब्यञ्जनकार, मिसा गुथिया केन्द्रीय संयोजक कमला अमात्य लगायतपिंसं उगु ज्याझ्वलय् ब्वति काःगु खः ।
ज्याझ्वः नेवाः मिसा गुथि, नेपालमण्डल यल लागाया नकिं सुशीला शाक्यया सभापतित्वय् जूगु खःसा गुथिया न्वकु चमेली शाक्यं लसकुस यानादीगु खः ।
सम्मेलनं झिंछम्ह दुजः दुगु न्हूगु ज्यासना पुचः नं ल्यःगु दु। सम्मेलनं नेवाः देय् गुथि, नेपालमण्डलया वइगु श्रावण १० गते जुइगु प्यक्वःगु देय् मुनाय् ब्वति कायेत पर्यवेक्षक व प्रतिनिधिपिं ल्ययेगु ज्या नं जूगु खः ।
