नेप्से कुहां वनेगु क्रम जारी
येँ (सन्ध्या टाइम्स)/ नेपाल स्टक एक्सचेन्जय् म्हिगः जूगु शेयर कारोबारय् नं नेप्से परिसूचक कुहां वंगु दु। थुगु वालय् जूगु शेयर कारोबारय् नेप्से सोमवाः छन्हु जक थहां वंगु दुसा हाकनं कुहां वनेगु क्रम शुरु जूगु दु। म्हिगःया कारोबारय् नेप्से छगू बाहेकं मेगु दक्वं समूहया परिसूचक धाःसा थहां वंगु दु। नेप्से म्हिगः शून्य दशमलव १३ अंकं कुहां वयाः ७३७ दशमलव ८४ अंकय् थ्यंगु दु। सेन्सेटिभ १ दशमलव शून्य २ अंकं थहां वंगु दुसा फ्लोट नं शून्य दशमलव ३८ अंकं थहां वन ।
म्हिगःया कारोबारय् नं नेप्से कुहां वःगुया मुख्य कारण जलविद्युत हे जुल। वाणिज्य बैंक समूह थहां वंसा नेप्से धाःसा कुहां वल। थुगु समूह ४ दशमलव ९२ अंकं थहां वनाः ७८२ दशमलव ६७ अंकय् थ्यन। अथे हे विकास बैंक समूह ५ दशमलव ४९ अंकं थहां वनाः ७५८ दशमलव ८५ अंकं व फाइनान्स समूह ३ दशमलव ४९ अंकं थहां वनाः ६९९ दशमलव ३६ अंक थ्यंगु दु ।
उखे म्हिगःया कारोबारय् विमा समूहपाखे छुं हिउपाः वःगु मदुसा जलविद्युत समूहया परिसूचक ७ दशमलव ६२ अंकं कुहां वयाः ९८० दशमलव शून्य ७ अंकय् थ्यंगु दु ।
नेप्से कुहां वनेगु क्रमं निरन्तरता कया च्वंसां कारोबार कम्पनीया ल्याः थहां वनाच्वंगु दु। म्हिगः नेप्सेय् ख्वीन्यागू कम्पनीया शेयर कारोबार जुल। अथे हे कारोबार कम्पनीया लिसें शेयर कारोबार नं थहां वंगु दु। गुकिं यानाः म्हिगः निगू लाख न्यय्छद्वः स्वसः व नीन्हय्गू कित्ता शेयरपाखें झिंनिगू करोड न्हय्खुगू लाख व खुद्वः तका दांया कारोबार जुल ।
कारोबार जूगु कम्पनीत मध्येय् दकलय् अप्वः इन्फ्रास्ट्रक्चर डेभलपमेण्ट बैंकया शेयरय् प्रति कित्ता ५०/- तका थहां वंगु दुसा स्टायण्डर्ड चार्टर्ड बैंकया शेयरय् दकलय् अप्वः ५५/- तका दां कुहां वन। नापं नेपाल बङ्गलादेश बैंकं दलकय् अप्वः शेयर कारोबार याःगु दु। इन्फ्रास्ट्रक्चर बैंकं दकलय् अप्वः कमे याःगु दुसा पशुपति डेभलपमेण्ट बैंक दकलय् अप्वः गुमे याःगु दु ।
