संवैधानिक समितिया सभापतिलय् थःथःगु अडान
खाली जुयाच्वंगु संवैधानिक समितिया सभापतिलय् सत्तारुढ नेपाली कांग्रेस व प्रमुख प्रतिपक्षी एकीकृत नेकपा (माओवादीं) थःथःगु पार्टीया नेता जुइमाःगु अडान काःगु दु ।
संवैधानिक समितिया सभापतिइ ल्ययेगु ज्याय् दलतय्सं ध्यान मबीगु धासें दलतय् ध्यानाकर्षण यायेत संविधान सभाया अध्यक्ष सुवास नेम्वाङं आव्हान यानादीगु बैठकय् माओवादी व कांग्रेसं नेतातय्सं थःथःगु हे अडान काःगु दु । बैठक लिपाः पत्रकारत नाप खँल्हाबंला यानादिसें माओवादी अध्यक्ष पुष्पकमल दाहाल 'प्रचण्डं' संवैधानिक समितिया सभापतिइ माओवादीयात हे देयेमाःगु बीचाः प्वंकादिलसाः कांग्रेस उपसभापति रामचन्द्र पौडेलं नं समितिया सभापति कांग्रेसयात देयेमाःगु अडान कयादिल ।
संविधानसभाया अध्यक्ष एमालेयात व उपाध्यक्ष माओवादीया भागय् लाःगु, सरकारया नेतृत्व एमाले व प्रतिपक्षी दलया भुमिका माओवदीं निर्वाह यानाच्वंगुलिं नं समितिया सभापति कांग्रेसयात देयेमाःगु दाबी उपसभापति पौडेलं यानादिल ।
एमाले, कांग्रेस व माओवादी स्वंगू दलयात जक दुगु बैठकय् माओवादी अध्यक्ष प्रचण्डं संविधान निर्माण व शान्ति प्रकृयालय् दक्वं दल प्रतिबद्ध जुसां इमान्दार जुया संविधान निर्माणया निंतिं न्हयेमाःगु धयादिल ।
अथेहे एमालेया अध्यक्ष झलनाथ खनालं धासाः सहमतिलय् संवैधानिक समितिया सभापति ल्ययेमाःगु धयादिल । वयेकलं दक्वसियां एजेण्डा संविधानय् दुथ्याकेमाःगु खँ बः बियादिल ।
सभामुख सुवास नेम्वाङं धासाः सहमतिया विकप्ल मदुगु धासें सहमति यानाः संविधान निर्माणय् लगेजुइत नेतातय् ध्यानाकर्षण यानादिल ।
स्वंगु दलया मंका: बैठक लिपा सभामुखं स्वंगुलिं दलया नेतात नाप बिस्कं बिस्कं हे सहलस नं यानादीगु ख: ।
