संविधान बारे स्वंगू दलया मंकाः बैठक
येँ (सन्ध्या टाइम्स)/संविधान दयेकेगु ज्याय् वयाच्वंगु पंगःयात चीकेत थौं सभामुख सुवास नेम्वाङं देय्या प्रमुख स्वंगू राजनीतिक दलया नेतातय्त सःताः सहलह यानादीगु दु ।
वय्कलं थौं सत्तारुढ एमाले, कांग्रेस व प्रमुख प्रतिपक्षी दल माओवादीया नेतातलिसे सहलह यानादीगु खः ।
थीथी राजनीतिक पार्टीया दथुइ थीथी समितिं तयार याःगु सुझावया बारे विवाद ब्वलनाः इलय् हे सुझाव तयार याये मफयेवं वय्कलं थौंया बैठक सःतादीगु खः। लिसें थौंया बैठकय् संवैधानिक समितिया अध्यक्ष माधव नेपाल प्रधानमन्त्री जुइधुंकाः प्वनाच्वंगु संवैधानिक समितिया अध्यक्ष ल्ययेगु बारे नं सहलह जुइगु खँ धाःगु दु ।
इलय् सुझावत तयार याये मफुगुलिं थौंकन्हय् संविधानसभाय् ज्या मदयाच्वंगु बारे नं बैठकय् सहलह जुइ। दलतय् मतभेदं यानाः संविधान च्वयेगु कार्यतालिकाय् न्याक्वःगु संशोधन यायेधुंकूगु दु ।
