माइक्रोबस हडताल
येँ (सन्ध्या टाइम्स)/ ताम्सालिङ्ग बन्दया इलय् माइक्रोबस तछ्याना बिउगु विरोधय् थौं २३ नम्बर रुट बालाजु लागाय् यातायात व्यवसायीतय्सं यातायात बन्द याःगु दु ।
उमिसं तोडफोड जूगु गाडीया क्षतिपूर्ति बीमाःगु व चालकया सुरक्षा जुइमाःगु, तोडफोड याःपिंत कारवाही यायेमाःगु माग यासें यातायात चले मयाःगु खः ।
अथे हे वंगु मंगलवाः त्रिचन्द्र क्याम्पस न्ह्यःने नं छगः माइक्रो बस तछ्याना बिउगु विरोधय् ५ नम्बर रुटया यातायात नं थौं बन्द जुयाच्वंगु दु। उमिसं कन्हय् स्वनिगलय् माइक्रो चले मयायेगु घोषणा याःगु दु ।
नेपाल यातायात व्यवसायी महासंघ व उत्तर भेगीय माइक्रो बस व्यवसायीं मंकाः कथं थुगु आन्दोलन घोषणा याःगु खः ।
