पुँजी बजाः विकासया निंतिं सीडीएस प्रणाली
येँ (सन्ध्या टाइम्स)/अर्थ मन्त्री सुरेन्द्र पाण्डें नेपालय् केन्द्रीय निक्षेप प्रणाली (सीडीएस) स्थापना यायेगु निंतिं अन्तर्त्रि्कयाय् ब्वति कायेत वःगु भारतीय प्रतिनिधिमण्डलयात नाप लानादीगु दु ।
सीडीएस इण्डिया लिमिटेडया वरिष्ठ उपाध्यक्ष साइरस खम्बाटाया नेतृत्वय् वःगु प्यम्हेसिया प्रतिनिधि मण्डलयात नाप लायेगु झ्वलय् अर्थमन्त्री पाण्डें सरकार पूँजी बजाःया विकासया निंतिं कृतसंकल्पित जूगुलिं हे थुगुसीया आर्थिक दँया बजेटय् सीडीएस स्थापनाया बारे नं उल्लेख यानागु जानकारी बियादिल ।
अर्थ मन्त्री पाण्डें पूँजी बजाःया बारे भारतयाके आपालं अनुभव दुगुलिं नेपालय् नं थुकथंया सीडीएस स्थापना यायेत आवश्यक ग्वाहालि दइगु बिचाः प्वंकादिल ।
वंगु न्यादँया दुने शेयर बजारय् सूचीकृत जूगु कम्पनीया ल्याः, कारोबारया आकार, लगानीकर्तातय् ल्याः अप्वया वनाच्वंगु ल्याखं नेपाःया पूँजी बजाः नं उल्लेख्य रुपं थहां वंगु जानकारी अर्थमन्त्री पाण्डें बियादीगु खः ।
वय्कलं कार्यान्वयनया ज्या तःधंगु मात्राय् भ्वँतय् जक सीमित जुयाः फर्छ्यौटया ज्याय् जुयाच्वंगु ढिलासुस्ती, नामसारीइ ढिलासुस्ती, लगानीकर्तातय् दथुइ ब्वलना वंगु अविश्वासं पूँजी बजारं हा कया वनाच्वंगु नं जानकारी बियादीगु खः ।
सीडीएसया स्थापना लिपा थुकथंया समस्या ज्यना वनीगु व कागजरहित कारोबारं पूँजी बजाःया विकासय् उल्लेख्य योगदान बीगु विश्वास सरकारं काःगु खँ अर्थ मन्त्री पाण्डें धयादीगु दु ।
उगु इलय् मन्त्रालयया सल्लाहकार केशव आचार्य, नेपाल स्टक एक्सचेन्जया महाप्रबन्धक शंकरमान सिंह, नायब महाप्रबन्धक प्रमोदकुमार भट्टराई व प्रबन्धक विजय गुरुङ्गया नं उपस्थिति दुगु खः ।
