सरकार कोइरालाया इशाराय् : गौतम
एमालेया उपाध्यक्ष बामदेव गौतमं प्रधानमन्त्री एमालेया जुसां वर्तमान सरकार कांग्रेस सभापति गिरिजाप्रसाद कोइरालाया इशाराय् चलेजुयाच्वंगु दाबी यानादीगु दु ।
पुष्पलाल स्मृति दिवसया लसताय् येँय् ग्वसाःग्वःगु छगू ज्याझ्वलय् न्ववासें वयेकलं वर्तमान सरकार कांग्रेस सभापति गिरिजाप्रसाद कोइरालाया इशाराय् चलेजुयाच्वंगु धयादिसें राष्ट्रिय एकतया सरकारं जक देय्या समस्या समाधान यायेफइगु धयादिल । एमाले दुने नं दक्षीणपन्थी भडकाव अप्वया वनाच्वंगु धासें नेता गौतमं नेतृत्वय् खनेदुगु दक्षीणपन्थी विचाःयात इलय् हे सुधार यायेमफुसाः एमालें थःगु अभिभार पूवंके मफइगु धयादिल ।
गौतमं पार्टी नेतृत्व व थीथी गुटय् खनेदुगु दक्षीणपन्थी बिचाः भविष्यय् अझ ब्वलंनेफूगु जूगुलिं ईलय् हे सतर्क जुइमाःगु बिचाः प्वंकादिल ।
माओवादी नेतृत्वया सरकारय् उपप्रधानमन्त्री नं जुयादिम्ह गौतमं नेपाःयात न्हूगु युगय् प्रवेश याकेत आः न्हूगु संविधानय् समाजवादया विशेषता समावेश यायेमाःगु धासें समाजवाद उन्मुख संविधान निर्माण यायेत एमाले व माओवादी मिलेजुया वनेमाः धयादिल । वयेकलं कम्युनिष्ट आन्दोलनयात सफल यायेत माओवादीया उग्रवामपन्थी भडकाव व युद्धकाली रणनीति बाधक जूगु धयादिल ।
