शुक्रवाः निसें स्वनिगलय् सार्वजनिक सवारीसधान चलेमजुइगु
थीथी पुचःलं याःगु आन्दोलनय् क्षतिग्रस्त सवारी साधनया क्षतिपूर्तिया माग यासें आन्दोलन यानाच्वंपिं यातायात व्यवसायीतय्सं शुक्रवाः निसें स्वनिगःया सार्वजनिक सवारीसाधन चलेमयायेगु निर्णय याःगु दु ।
बिहीवाः यातायात व्यवसायीतय्सं याःगु शान्तिपूर्ण र्यालीइ प्रहरीं हस्तक्षेप याःगु धासें यातायात व्यवसायी राष्ट्रिय महासंघ उपत्यका समितिं थंज्याःगु निर्णय याःगु खः । बिहीवाः व्यवसायीतय्सं सवारी साधन सहित पिकाःगु जुलुसय् प्रहरीं नारायणगोपाल चोकय् हस्तक्षेप याःगु खसाः अन व्यवसायीत व प्रहरी दथुइ झडप नं जूगु खः ।
प्रहरीया हस्तक्षेप व झडप लिपा बागमती अञ्ल समितिया बैठकं शुक्रवाः निसें अनिश्चितकालया निंतिं सार्वजनिक सेवाया सवारी साधन ग्यारेजय् तयेगु निर्णय याःगु खः ।
वंगु मंगलवाः त्रिचन्द्र कलेज व बालाजुइ च्याकूगु माइक्रोबसया क्षतिपूर्ति व प्रहरी हस्तक्षेपया विरोधय् सवारी साधन चलेमयायेगु निर्णय याःगु खँ व्यवसायी महासंघं धाःगु दु ।
