मन्त्रीया दबावलिपा राखेपया सदस्या सचिवपाखें राजीनामा

खेलकुद राज्यमन्त्रीया दबावया वःगु धासें राष्ट्रिय खेलकुद परिषद (राखेप)या सदस्य सचिव जीवनराम श्रेष्ठं पदपाखें राजीनामा बियादीगु दु ।

श्रेष्ठं बिहीवाः येँय् छगू पत्रकार सम्मेलन यानाः मन्त्री गणेश नेपाली नाप थःगु बांलाःगु स्वापू मदुगु धासें नेतृत्व परिवर्तनया निंतिं मार्ग प्रशस्त यायेत पदपाखें राजीनामा बियादीगु धयादिल ।

२०६२/६३ या जनआन्दोलन लिपा गठन जूगु मंकाः सरकारया पलाय् श्रेष्ठ राखेपया सदस्य सचिव जुयादीगु खः । एमालेया केन्द्रीय दुजः नं जुयादिम्ह श्रेष्ठया राजीनामा बियादिसें सरकार मातहतया निकायलय् राजनीतिक नियुक्ति बन्द जुइमाःगु धयादिल ।

सरकार परिवर्तन लिपा खेलकुद मन्त्रालय तराई-मधेस लोकतान्त्रिक पार्टीया भागय् लायेवं मन्त्री नेपालीं थः निकटयात नियुक्त यायेत श्रेष्ठयात राजीनामा बीत दबाव बियावयाच्वंगु खः ।