छुं दिं दुने हे शान्ति सुरक्षाय् सुधार : गृहराज्यमन्त्री
गृह राज्यमन्त्री रिजवान अंसारीं छुं दिं दुने हे आम जनतां महसुस यायेफइ कथं शान्ति सुरक्षाया अवस्थाय् सुधार वइगु दावी यानादीगु दु ।
राज्यमन्त्री जुइधुंकाः न्हापांगु खुसी थःगु निर्वाचन क्षेत्रया भ्रमण यायेत गृह जिल्ला सर्लाही थ्यंकादिम्ह अंसारीं बिहीवाः नवलपुरय् ग्वसाःग्वःगु छगू ज्याझ्वलय् शान्ति सुरक्षा कायम यायेत येँय् नं अभियान न्ह्याकेधुनाःगु व तराईया अशान्त जिल्लाय् नं छुं दिं दुने हे परिवर्तन महसुस यायेफइगु धयादिल ।
वयेकलं जबर्जस्ती चन्दा, हत्या, अपहरण थंज्याःगु सर्वसाधारणयात सास्ती जुइगु ज्यात दिकेत मन्त्रालयं चालु कानूनया अधिकतम सदुपयोग यायेगु धयादिल । असल मनसायं बल छ्यलेमालेफु धासें मन्त्री अंसारीं उकीया निंतिं जनताया ग्वाहालि व समर्थन आवश्यक जूगु धयादिल ।
येँया 'डन'तय्त प्रहरीं धमाधम ज्वनाच्वंगु खँ कुलादिसें वयेकलं अज्याःगु ज्या देय्न्यंय याकन हे जुइगु धयादिल । सशस्त्र पुचःया नांमय् जुयाच्वंगु अपराध दिकेत कानून बमोजिम सुरक्षा निकाययात अधिकतम परिचालन यायेगु नं धयादिल ।
