अनमिनया म्याद खुला थप
सुरक्षा परिषदं प्यक्वःगु खुसी नेपालय् दुगु राष्ट्रसंघीय मिसन (अनमिन)या म्याद थप याःगु दु । राष्ट्रसंघ अनमिनया कार्यावधि वइगु माघ ९ तकया निंतिं थप याःगु दु ।
साउन ८ निसें म्याद क्वचायेत्यंगु अनमिनया म्याद थप यायेत वंगु असार २४ गते नेपालं राष्ट्रसंघया महासचिव बान कि मुनयात इनाप यासें पौ च्वःगु खः । परिषदया बैठकं मंगलवाः याःगु निर्णय बिहीवाः तीनि सार्वजनिक याःगु खः ।
सोमवाः व मंगलवाः च्वंगु सुरक्षा परिषदया बैठकय् न्याःगु स्थायी नापं झिंन्यागू दुजः राष्ट्रतय्सं अनमिनया म्याद थाप यायेत सहमति प्वंकूगु खः । नापं बैठकं नेपाःया शान्ति प्रक्रिया प्रगतिबारे तीव्र असन्तुष्टि प्वंकूगुदु । बैठकं राजनीतिक दलत दथुइया सहमितं जक शान्ति प्रकृयायात निष्कर्षय् थ्यंकीगु नं ठहर याःगु दु ।
अनमिनया म्याद थप यायेत महासचिव बानं असार २९ गते परिषद समक्ष प्रतिवेदन पेश यानादीगु खः । अथेहे परिषदं नेपाः सरकरया प्रतिबद्धता कथं शान्ति प्रगतिबारे स्वलाः लिपाः प्रतिवेदन पेस यायेत महासचिव बानयात निर्देशन ब्यूगु दु ।
