कांग्रेसया बैठक आइतवाः तकया निंतिं स्थगित
एमाले व माओवादीया बैठक नं स्थगित
सत्तारुढ नेपाली कांग्रेसया केन्द्रीय समितिया बैठक आइतवाः तकया निंतिं स्थगित जूगु दु ।
पार्टी ज्याकू सानेपाय् बिहीवाः निसें सुरु जूगु बैठकय् राज्य पुनसंरचना सम्बन्धि उपसभापति गोपालमान श्रेष्ठया संयोजकत्वय् गठित समितिं न्ह्यब्वःगु प्रतिवेदनय् सहलह न्ह्याःगु खः ।
कांग्रेस दुने पुनसंरचनाया विषयस स्वंगु थीथी प्रतिवेदन सार्वजनिक जूगु दु । केन्द्रीय दुजःत नरहरि आचार्य व गोविन्दराज जोशीं नं थःथःगु हे प्रतिवेदन सार्वजनिक याःगु दु । बैठकय् केन्द्रीय दजःतय्सं प्रतिवेदन अध्ययन यायेमाःगु धासें ई फ्वनेवं बैठक आइतवाः तकया निंतिं स्थगित या:गु खः । बैठकय् दुजःतय्सं मेमेगु सार्वजनीक विषलय् नं सहलह यायेमाःगु माग याःगु दु ।
अथेहे सत्ता नेतृत्व यानाच्वंगु नेकपा (एमाले)या स्थायी कमिटीया बैठक च्वंहे मच्वंसें स्थगित जूगु दु । बिहीवाः निसें पार्टी ज्याकू बल्खुइ च्वनीगु धाःगु बैठक एमालेया शीर्ष नेतातय् कार्य व्यस्थताया कारणं स्थगित याःगु खः ।
अथेहे प्रमुख प्रतिपक्षी दल एकीकृत नेकपा (माओवादी)या केन्द्रीय समितिया बैठक नं स्थगित जूगु दु । पार्टी अध्यक्ष पुष्पकमल दाहाल 'प्रचण्ड'या राजनीति प्रतिवेदनय् सहलह जुयाच्वंगु बैठकय् बिहीवाः अध्यक्षं उकी लिसः बीगु ज्याझ्वः दुगु खः । नेतातयसं थप गृहकार्य यायेत ई फ्वनेवं बिहीवाः बैठक च्वंहे मच्वंसें बैठक स्थगित याःगु खः । बैठक शुक्रवाः च्वनीगु जूगु दु ।
