उग्रवामपन्थया खतरा जूगु प्रधानमन्त्रीया दावी
प्रधानमन्त्री माधवकुमार नेपालं आः उग्रवामपन्थया खतरा जूगु दाबी यानादीगु दु ।
येँय् चम्पादेवीइ बुधवाः नेपाः कम्युनिष्ट पार्टीया संस्थापक मदुम्ह पुष्पलाल श्रेष्ठया झ्वाताः उल्लेज्या यायेगु ज्याझ्वलय् वयेकलं माओवादीया लिप्पांगु गतिविधि पाखें उग्रवामपन्थया खतरा जूगु धयादिल ।
प्रधानमन्त्री नेपालं लोकतान्त्रिक गणतन्त्र संस्थागत यायेत दक्वं शक्तित मिलेजुइगुया विकल्प मदु धासें वर्तमान सरकार नं थ्वहे बिचारधारय् गठन जूगु धयादिल । कांग्रेस नाप मिलेजुया वंगुं कारणं हे राजतन्त्रया अन्त्य जूगु धयादिसें वयेकलं लोकतान्त्रिक गणतन्त्रया निंतिं कांग्रेस नापया सहकार्य अत्यावश्यक जूगु धयादिल ।
ज्याझ्वलय् मदुम्ह पुष्पलालया झ्वाताः उल्लेज्या यानादिसें वयेकलं सहमतिया संरचनाय् लोकतन्त्रयात पूर्णता बीत गठन जूगु सरकारया विरोध याइपिं गणतन्त्र विरोधी जूगु धयादिल । लोकतन्त्र व कम्युनिष्ट पार्टी छगूलिं मेगूया पूरक जूगु टिप्पणी यानादिसें प्रधानमन्त्री नेपालं बहुदलीय जनवाद उकीया परिपूरक जूगु धयादिल ।
