नेपाःयात माः दँय् ३५ लाखम्ह म्येय्
येँ (सन्ध्या टाइम्स)/थौंकन्हय् म्येय्या लाया भाः थहां वनाच्वंगुया छता कारण चीनय् ला यंकाच्वंगुलिं खःसा मेता कारण माक्व म्येय्या आपूर्ति मजूगुलिं खः ।
ला व्यापारी इन्द्रप्रसाद खड्गीया कथं नेपालय् दँय् ३० निसें ३५ लाख म्ह म्येय्या माग दुसा नेपालय् थुकिया उत्पादन धाःसा १० प्रतिशत अथे धइगु थ्यंमथ्यं ४ लाख म्येय् जक दु।
म्येय्या थ्व मागयात ध्यानय् तयेबलय् नेपालय् पशु कृषियात जक ध्यान बीगु खःसां आपालं रोजगारी सिर्जना यायेफुगु वय्कःया बिचाः दु ।
थुकिया निंतिं ला व्यवसायीतय्सं पहल यायेमाःगु व पशु लहीपिं कृषकतय्त सुरक्षाया प्रत्याभूति याये फत धाःसा म्येय् लहीगु व्यवसायं हे नेपाःया आर्थिक विकासय् तिबः जुइगु बिचाः नं वय्कलं प्वंकादी ।
वय्कःया थ्व खँयात मेम्ह ला व्यापारी न्हुच्छेरत्न खड्गी (वामन दाई) नं स्वीकार यानादिसें धयादी, 'ब्राजिलय् द्वहं व म्येय् लहिउ थें नेपालय् नं म्येय् लहीगु खःसा छखे दुरुपाखें उत्पादन जुइगु सामानया बजाः दइसा मेखे लाया आपूर्ति नं सहज जुइ ।'
ब्राजिलय् थनिं खुदँ न्ह्यः सरकारं विशेष प्याकेज प्रोग्राम हे हयाः द्वहं व सा लहित कृषकतय्त प्रोत्साहन याःगु खः।
वय्कःपिं निम्हेसियां बिचारय् नेपालय् म्येय् लहीगु ज्यायात सरकारी स्तरं प्रोत्साहन यायेगु खःसा नेपाली म्येय्या ला चीनय् तकं निर्यात यानाः अझ यक्व लबः काये फइगु स्थिति दु ।
चीन छगू विशाल जनसंख्या दुगु देय् जूगुलिं अन नेपालं याउँक हे लाया बजाः काये फइगु खँय् नं वय्कःपिं निम्हं सहमत दु ।
भारतं म्येय् मवयेधुंकूगु कारणं लाया मेगु विकल्प मालेमाःगु खँय् नं वय्कःपिनि छगू मत दु ।
सरकारी तथ्यांक कथं नं नेपालय् कूल बजेटया ७ प्रतिशत लाया बजारं कयाच्वंगु दु ।
उखे मेम्ह व्यापारी बालकृष्ण खड्गीया कथं चिनियाँ व्यापारीतय्सं नेपालं म्येय्या ला चीनय् जक छ्वयाच्वंगु मखुसें अफगानिस्तानय् नं छ्वयेगु यानाच्वंगु दु ।
म्येय् लहीगु ज्यां ला जक मखु, दुरुजन्य उत्पादनपाखें अन्तर्राष्ट्रिय बजारय् समेत नेपालं लबः काये फइगु नं विज्ञतय्गु राय दु ।
